Turkiya macbarla 50 radoyotho folhoye l’İdlıb
Turkiya bu zabno dıkgırşo ahaylawothayda mhın nuqazyotho bu garbiyo d’Suriya, kımdawmo dmaqwiyo u haylayda ba fenyotho dkıtne bi morutho da grube mzayne da bnayqyomayda bi fnitho d’İdlıb.
Lfuth i mşatasto d’Suriya da zedqe noşoye, Turkiya mşadarla adyawma zıd me 50 radoyotho u kamyone folhoye la nuqazyothayda du duyoqo dkıtne bu tayımno d’İdlıb.
İmşatasto d’Suriya da zedqe noşoye makadla du gayso kaboşo dı Turkiya macbarle adyawma ba şoce d’fothıdsafro, zıd me 50 radoyotho u kamyone folhoye la narcotho d’Suriya bu darbo di nuqazto dı Kafarlusin.
Lfuth i mşatasto, u konvoy Turkoyo nqile alat folhoye u mcadronutho lojistik la nuqazyothayde du duyoqo dkıtne bu taymno di fnitho d’İdlıb.
Bu şıkılano, Turkiya mu yarho d’Şbot dşaficina u hul ucdo macbarla zıd me 11 alfo u 130 radoyotho u kamyone folhoye li fnitho d’İdlıb dıknıflo bu garbay macırbo d’Suriya.
Meqım mathe, u ajans d’Reuters mawdacwole dı Turkiya grışla ahaylawothayda ma narcotho dkıtne bi morutho du rejim d’Suriya, u nqılila la fenyotho dıkmidabri ma grube mzayne bnayqyomayda dkıtne b’İdlıb.
Bebzabno, mabuco Turkoyo bi maqırhonutho dhule l’Reutres mawdacle dı Turkiya grişo m’şwac nuqazyotho mbayn da 12 nuqazyotho du duyoqo dımşatsiwola ba fenyotho d’Hama u İdlıb. U mabuco Turkoyo mawdacle da fulhone du groşo da haylawotho kamili yawme d’hamşo dşaficina, u maqrahle ste du groşo da haylawothani latyo i mıcnayde dı Turkiya kmanqıso u menyono da folhayda b’Suriya, elo i sbutho balhude şuhlofo di duktho yo.
Turkiya lfuth u qyomo d’Soçi dımdewola cam Rusya i şato da 2018, mşataswola 12 nuqazyotho du duyoqo bu garbiyo d’suriya, u kıtla ucdo bayn 10 uhul 15 alfo folhe bu garbay macırbo d’Suriya.