Turkiya madcarla 1.200 galwoye hrene lu garbay macırbo d’Suriya

Bu zabno cayne d’britho cala qrobe dbeyn İsroyel u Hamas u d’Rusya u d’Ukraina’ne, i şultonutho d’Turkiya’ste kımdawmi bi tahraztayda du şuhlofo demoğrafoyo bu garbyo d’Suriya. A mşale Turkoye, nqilın athmıl 1.200 galwoye hrene lu garbay macırbo d’Suriya; beynothaye neşe u tloye.

A galwoyani, nqili bu darbo da thume d’Tel Abyad, Jarablus, Bab al Salame u Bab al Hawa dkıtne bu garbyo ubu garbay macırbo d’Suriya. Mawdıc d’240 galwoye maslımi la ğrobe noqufe d’Turkiya-u Gayso Athronoyo d’Suriya bu darbo du thumo d’Tel Abyad u nqili lu garbyo d’Raqqa.

A galwoyani’ste nqili la qentrune da ğrobani leşan a buqore. A Turkoye maslamlın’ste 550 galwoye lu ğrob d’Hayat Tahrir al Şam bu darbo du thumo d’Bab al Hawa u 210 galwoye nqili bu darbo d’Bab al Salame u 200 hrene bu thumo d’Jarablus.

Xıd aydarbo sımwo meqım, ucdo’ste a Turkoye mahıtte ido cala warqe ruşmoye da galwoyani, leşan naqla hreto dlo cubri la thumthe. A galwoyani kmitadcıri l’Suriya elo lo dukothathe a şerşoye, kmitadcıri elo kmitarkıwi ba dukotho dkıtne kbişe ma hayle Turkoye uma noqufathe a marhıbone.