Turkiya mawqadla a turone di qritho du cameydan bu Iraq

A cuqobe dıksaymi a hayle kaboşe d’Turkiya calu gerilla di PKK bu garbyo du Iraq, naqla hreto huwlın husrono la qıryawotho du camaydan dkıtne qariwe la turone.

 Bu video dıfris bu tboco froso kenşoyo, kımahwe aydarbo yaqidi anarcotho di qritho du camaydan d’Bişmaye dkıtyo bi fnitho d’Barwar bu garbyo du Iraq.

Turkiya lıkşumco la zuhore ula sturye d’Boğdod u d’Arbil, cala hjome dıksaymo calu garbyo du Iraq. Bu zabno dkımdawmi a cuqobe da hayle kaboşe d’Turkiya calu gerilla di PKK bu garbyo du Iraq, kımdawım u camaydanste dmiathır mrimono u dhoze husrono ma hjomani dıksaymi atayosyotho d’Turkiya, bnişo dmohın dharbo lu gerilla di PKK.

Ha manabne du camaydan frısle video bu tboco froso kenşoyo, u kımahwe aydarbo kıyuqdi a turone di qritho d’Bişmaye dkıtyo bi fnitho d’Barwar bu garbyo du Iraq. Bu videanoste kmiakıd, di nuro qdiho bu turo bıthır ma cuqobe da tayosyotho d’Turkiya calu qlimo.

Lu tetfiyo di nurathe bnişo dılo cubro li qritho d’Bişmaye, a comure kulle nafiqi leşan dmatfalla. Hathe latyo inaqla qamayto dkobo Turkiya husrono la dukothani du camaydan. Mcal fothe da cuqobani d’Turkiya calu garbyo du Iraq, xliq zuctho beyn da comure da qıryawotho frişe du qlimo d’Kurdistan uğerste jbiri dtorın ma botathe u dımgalwın lğer dukotho.