Turkiya mhela bıqritho du cameydan bu Iraq
A hayle kaboşe d’Turkiya, beyn da hjome haroye dsımlın cala fenyotho du garbiyo du Iraq, mıdlın i qritho du camaydan d’Qaşa Fır nişo la cuqobathe.
Ba hfuxye dmahwın cala hjomani d’Turkiya, u Iraq naqla hreto maslamle lu rişizgado Turkoyo egartho du protesto wan athrawotho d’Mısır wi Scudiye b’qaşyutho krıhlın i mudaxala folhoyto d’Turkiya udu İran lu garbiyo du Iraq.
Athmıl bi şoctho d’casriye, a tayosyotho d’Turkiya sımlın hjomo cali qritho d’Qaşa Fır du camaydan dkıtyo masırto bi qastra d’Simele u dıkruhqo belhude 27 kilometre me Nuhadra bu garbiyo du Iraq. Calu hjomano dxlıqle zuctho rabtho beyn da comure du camaydan, hın mabuce di mşaynutho d’Simele, mawdaclın du hjomano sim b’Helikopter dımhela soruhe bu turo d’Sabe dkıtyo lalcıl di qritho d’Qaşa Fır.
Ba hfuxye gawoye u qlimoye dmahwın mqabıl da hjomani, i wazirutho di baroyutho du Iraq athmıl mawdacla dıqrela naqla hreto u rişizgado d’Turkiya u maslamle egartho qşitho du protesto, u sımle qroyto l’Ankara dmakılyo a dyoşani calu Iraq. Ube bzabno, i wazirutho di baroyutho athmıl mawdacla dıqrelaste u rişizgado du İran u maslamlale egartho du protesto calu hjomo dsımwole u İran meqım 2 yawme cal qıryawotho bi hiğmonutho d’Arbil, u sımla qroyto l’Tehran dımyaqro i morutho du Iraq u dmakılyo ahjomani.
Ubi Sulemaniye bu qlimo d’Kurdistan, ba mowat d’mtagılyone mhalaxlın ba zabuqone di mditho u mazcaqlın slogane u tlıbe dmitawfıqi a hayle kaboşe d’Turkiya man arcotho du Iraq. Camgabıdathe, i wazirutho di baroyutho di Scudiye bu buyono dıfrısla, krıhla uhjomo bceldbobo d’Turkiya udu İran calu Iraq, u mzaharla calu qento dkito cali mşaynutho du qlimo. Bebzabno, i wazirutho makadla di Scudiye ksındo u Iraq ba tedbire dgıdmoyıd bnişo dmınfıq moro li morutho uli mşaynuthayde.
Me gabo hreno, i wazirutho di baroyutho d’Mısır bu buyono dfrısla b’qaşyutho krıhla i mudaxala folhoyto d’Turkiya udu İran, u mawdacla da hjomani a bceldbobe dewam di şişaltho da hjome dıkmisomi calu Iraq u dıkdayşi a qyome Emwothoye dıkımyaqri i morutho dan athrawotho uda prensibe di şbobutho.
Camatheste, u notarrozo gawonoyo catiqo du Huyodo Caraboyo Camır Musa, bi maqırhonutho dhule mawdacle d’Turkiya kımathlo ucdo u qento rabo dkulle calu cılmo Caraboyo, u mırle; Turkiya folhoyith krumşo ba yawme haroyani b’3 dukotho bu cılmo Caraboyo. Bu garbiyo du Iraq ba hjome oyaroye dıksaymo, bu garbiyo d’Suriya kıtla hayle cali arco, ubı Libya kıtla ithutho oyaroyto udu yamo u marhıbone.
Bu taro da hfuxyani, i rişonitho zawgoyto du Bayto Ezidoyo bu qlimo di Gozarto d’Suriya Layla İbrahim, krıhla a hjome haroye dsimi calu garbiyo du Iraq, u makadla di bcolboboyuthathe dewam da hjome dsimi cala Ezidoye me mowat dışne’yo. İbrahim mırla’ste; Erdoğan adyawma kımkamıl u mede dlo qadiri an abohothayde a Cuthmanoye wa noqufayde d’Dacış dı quşci u camo Ezidoyo.