Turkiya mu şuroyo du yarhano d’İlıl u hul ucdo qtila 40 mdinoye bu athro d’Suriya

U gayso kaboşo dı Turkiya mu şuroyo du yarhano d’İlıl uhul ucdo, qtile 40 mdinoye bu athro d’Suriya, baynothaye zıd m’15 nacime.

Camgabıdathe, a’grube çatawiye dı Turkiya msıklın hamşo farsufe mi caşırto Caraboyto d’Ilbucsaf bi fnitho dı Tel Abyad, cal dıfris tre buyone mşahılfe bışmıd di caşırtathe, baynothaye buyono dıkmahwe snodo l’Turkiya, wu hreno kmawdıc du buyono qamoyo lkımmathıl i caşırto d’Ilbucsaf.

İ mşatasto da zedqe noşoye d’Suriya bu taşroro dıfrısla, mawdacla du gayso kaboşo dı Turkiya kımdawım bu qatlo da mdinoye Suriye ba fenyotho dıkbışile. U qatlano ya bu darbo du buğre dıkmarisi a’noture da thume yo, yaste ba foqucwotho dıkmihalqi u yaste bu darbo da gedşe du dyoşo da radoyotho folhoye dlıkmahwın yasifutho la haye da bnaymothoye d’Suriya.

İ mşatasto d’Suriya makadla ste d’zayidi bu yarho d’Ob dşaficina, a’dyoşe dıkmisomi mi jandurma Turkoyto bhaq da Suriye dkıbci dmahızmi mu qrobo udşıfci la n’arcotho dı Turkiya. A’noture da thume dı Turkiya bidactho kmhon a’Suriye, ub’şıklat mşahılfe ksaymilın teşniqe. Lfuth i mşatasto d’Suriya, a2folhe Turkoye qtilın bu yarho dşaficina ışto Suriye baynothaye nacimo bu zabno dımnaselın dşıfci a’thume. Bu şıklano u menyono da mdinoye Suriye dıqtili mu gayso Turkoyo mu şuroyo di şatathe uhul ucdo yasıq l’40 farsufe, baynothaye arbac neşe u 16 nacime dıqtili b’şıklat ub’teşniqe mşahılfe.

M’gabo hreno, a’grube çatawiye dı Turkiya msıklın athmıl hamşo farsufe idice mi caşırto Caraboyto d’Ilbucsaf bu hçomo dsımlın cala botaththe bi qritho d’Cali Baçliya bi fnitho dı Tel Abyad.

Lfuth North Press, a’farsufani msiki cal dıfris bışmıd di caşırtathe tre buyone dlaquble dıhdode bi sbutho du snodaththe l’Turkiya. U buyono qamoyo dıfris bışmıd di caşırto bi fnitho dkıtyo kbışto m’Turkiya b’Tel Abyad, makadle dıksonıd u gayso Turkoyo wa çatawiyayde. Elo bu vidio dıfrıswo bu yarho d’Ob dşaficina, ha ma rişone di caşırto d’Ilbucsaf dkıtne bi Raqqa, mawdacle du buyono qamoyo dıksonıd Turkiya lkımmathıl i klayto di caşırtayde, u makadlın cali ahonutho da n’abne di caşırto.

Lfuth North Press, a’hamşo farsufe dımsiki lıkmidıc hul ucdo mınyo i ctiduthaththe u layko mawbıli.