Turkiya ocdo khıjmo cal Nuhadra u Şigor

A helikoptere wa tayosyotho da hayle kaboşe d’Turkiya dmaqşelın a cuqobathe calu gerilla di PKK bu garbyo du Iraq, mhelınste ucdo ba dukotho da Ezidoye bi fnitho d’Şigor.

 A Haylawotho du Delqublo d’Şigor makadlın, da tayosyotho d’Turkiya mabdelın cuqobe hathe cala dukotho da mdinoye b’Şigor.

Turkiya du nişayda dkubşo u dmaqwiyo u haylayda bu Madınho Mescoyo, maqşela a cuqobayda cali hiğmonutho d’Nuhadra bu garbyo du Iraq, bu zabno dmabdelaste cuqobe cali fnitho da Ezidoye Şigor. Turkiya kımdacyo, da cuqobani kmisomi calu gerilla di PKK. Elo u camo dıksoyım sturyo u qedomano d’Turkiya kımawdıc, da hayle Turkoye kmohın ba dukotho dlayto gerilla ebeye.

Mawdıc da helikoptere d’Turkiya, sımlın athmıl casriye cuqobe cal 3 qıryawotho frişe dkıtne hedor Nuhadra. Ba cuqobani d’Turkiya, hiw husrono la dukotho da mdinoye. Bebzabno mawdıcste, da Haylawotho du sutoro du Camo-HPG ba cuqobe casye dsımlın ahayle Turkoye b’Haftanin, qtilın 7 folhe u mjarahlın 3 hrene. Me gabo hreno a Haylawotho du Delqublo d’Şigor frıslın maqırhonutho lu ray dıbritho cala hjome haroye dsımlın a tayosyotho d’Turkiya cali fnitho.

Bi maqırhonuthathe a Mharbone da Ezidoye mawdaclın, da tayosyotho dılo pilote d’Turkiya sımlın adyawma naqla hreto cuqobe cal Şigor. 15 bu yarho d’Hzironste sımwola Turkiya cuqobe cal Şigor wa hjomani kımdawmi dılo kloyo, leşan dmımhe dharbo la mharbone da hayle Ezidoye. Bebzabno i wazırto du sutoro d’Fransaste laqyo u bar amnayda u Iraqoyo u camhıdode drışlın ahjomani dıksaymo Turkiya cali morutho du Iraq u kalınste calu ağuno dıkmitahwe mqabıl da marhıbone d’Dacış

Camgabedathe mawdıc, da folhe u da powelıs Turkoye sımlın cuqobe dilonoye bı dukotho frişe di mditho d’Omid. A cuqobani mawdıc dıkmisomi cal asas d’cuqobe cala şabakat da gelone mtanwone, elo i şultonutho d’Ankara, khujmo cala Kurdoye noqufe d’HDP u da hayle di PKK.