Turkiya rışmoyith grişo mu qyomo d’Stanbul

Turkiya mawdacla adyawma dıgrişo ruşmoyith mu qyomo d’Stanbul dıknofıq mqabıl du cnufyo dıkmisım cala neşe b’Urifi.

Calu fusqonano, u tukoso du şbuqyo d’Emwotho Mhaydotho Amnesti İnternational, mawdacle dı Turkiya daciro 10 ışne laxalf bi sbutho da zedqe di athto.

Adyawma Turkiya mawdacla ruşmoyith dıgrişo mu qyomo d’Stanbul dıknofıq mqabıl du cnufyo dıkmisım cala neşe. U hathe i naqla qamaytoyo d’athro kmoyıd fusqono dmıgrış m’qyomo Urifoyo bıthır mdımdele acle.

Bi şato da 2011 bi mditho d’Stanbul, 45 athrawotho Urifoye baynothaye Turkiya mdewolın u qyomo d’Stanbul dıkmidıc bu ışmo ruşmoyo “u qyomo du mawtbo d’Urifi dıkmonıc udıknofıq mqabıl du cnufyo dıkmisım cali athto udu cnufyo dkowe b’gawıd di iqartho”.

Calu groşo dı Turkiya mu qyomo d’Stanbul, u tukoso du şbuqyo d’Emwotho Mhaydotho Amnesti İnternational mzaharle mu cnufyo dıkqoşe mqabıl di athto b’Turkiya, u mawdacle du fusqono du groşo mu qyomo kımmathıl egartho du qento, cal da hayobe kibın dfılti mu hşowo.

İ notrathrozo gawonoyto d’Amnesti Anis Klamar mırla “Turkiya daciro 10 ışne laxalf bi sbutho da zedqe di athto”.

M’gabo hreno, u mawtbo da neşe du gabo du dactid d’Suriya bu buyono dıfrısle lu ray gawonoyo dıbritho, b’qaşyutho krıhle u qatlo di claymtho Deniz Poyraz bu makıthbo di HDP bi mditho d’İzmir, u mawdacle dı Turkiya ba fulhone dıksaymolın, kıbci dmaciqo u zawco di athto bu haqlo folitiqoyo u folhoyo.

A’gunhe dsimi adşato cala neşe b’Turkiya xdu qatlo, u htofo wu tajawız zayidi 33% mqabıl da gunhe dsimiwo bi şato dşaficina. Lfuth hın şutose da neşe b’Turkiya, bi şato da 2020 qtılwo bu noquso 300 neşe ma gabraththe, u mqafewoste 171 şlade d’neşe dıqtiliwo l’celotho dkıtne ğnize.