Turkiya sımla cuqobe hrene cali qritho d’Chalki

Uqrobo kımdawım beyn da hayle kaboşe d’Turkiya udu gerilla di PKK bi hiğmonutho d’Nuhadra bu garbyo du Iraq.

Ucdo naqla hreto, sımlın a tayosyotho d’Turkiya cuqobe cali qritho du camaydan d’Chalki, dmaxlıyo’wa meqım zabno ma comurayda.

Anabne du camaydan dıkhoyanwo bi qritho d’Chalki b’Nuhadra, jbiriwo dmahzımi ma botathe mcal fothe da hçome dsaymiwo a hayle kaboşe d’Turkiya cali hiğmonutho bnişo dmıhyo dharbo lu gerilla di PKK. Gawonoyith i fnitho d’Kani Masi dkıtne hın ma qıryawotho du camaydan eba, kımdawmi dhowın nişo la hçomani d’Turkiya.

U mede dıkgorış u zuhoro, d’ğalabe ma qıryawothani’ste dlaybın Mharbone di PKK’yo, calathe kothe u şwolo-mınyo u nişo da hçomani d’Turkiya-en layt gerilla ebeye-qay kmıhçım cala dukotho da Mşihoye-u nişo u qşoco da camani a şerşoye’yo? Hani yarho, kıcayşi an abne du camaydan da qıryawothani xıd galwoye u lıkmaçrın ducri la botathe.

Hıdo galwoyto mu camaydan mırla; Cayifina mi aykanoyuthathe u dkull naqla kmıçborina li golutho. Turkiya wi PKK dımharbi ban arcothathe-mın haq kıtte aclayna? Anarcothaydan naşifi u mawqıdi, hiw husrono la botaydan ba hçomani dıksaymi cal hıdode.

Mawdıc dhol 20 qıryawotho du camaydan uda Kurdoye di fnithathe maxlın mcal fothe da taxtuşani, dımçarıh’ste 2 clayme Kurdoye. Hın ma comure dmahzamlın ma qıryawothani d’Nuhadra, kıcayşi b’Bersiye.