Turkiya u athro haroyo datre nafıq dlatle ebe a zedqe di hirutho u du maftah femo

Lfuth u taşroro dıfrısle u şutoso du bayto di hirutho u athro d’Turkiya ba 10 ışne haroyani u athro haroyo datreyo dkımwaxır ebe a zedqe di hirutho u du maftah femo.

 Me gabo hreno bi maqırhonutho dhule Ali Babacan dkobıc mşatıs gabo hatho mırle bmeho dıha gabro laybe midabır athro xıd Turkiya.

 Lfuth u taşroro şatonoyo dıfrısle u şutoso u bayto di hirutho mawdacle du athro d’Turkiya ba 10 ışne haroye mdarbıd dımhalıq dawsat lafqıdam kımhalıq dawsat laxalf bu darbo di hirutho du maftah femo u bi sbutho da zedqe noşoye.

U taşrorano dıfris dı ahıt ışme u ağuno dı latle rişono hawi droşo cal 195 athrawotho u 15 falqe u fınyotho.

Lfuth u mınyono dı mahıt 83 athrawotho kibın hirutho 63 kibın ışmo hirutho u 49 athrawotho latne hire. Lfuth i şato d’şafician 3 athrawotho naqisi bi lista da 83 athrawotho hire, bayn da athrawotho dkıtne ışmo hire zayıd 2 bamo, u athrawotho dı latne hire zayıd 1 bamo. Lfuth i listathe u athro dı Turkiya mahıtoyo bi lista da athrawotho dı latne hire awkith beyn da 49 haroye.

Bu taşroro dıfrısle u bayto di hirutho Turkiya bi sira da 31 puane da 49 athrawotho dlatne hire lfuth dathe kfayşo athro meqım mu athro d’Afriqya i garbiyoyto Burundi.

Bi mawdconutho dkito bu taşrorano kmitawmır d’ba 10 ışne haroye Turkiya kducro laxalaf bi hirutho du maftah femo u bi sbutho da zedqe noşoye.

Me gabo hreno u waziro dmeqım du gabo d’AKP Ali Babacan dkobıc mşatıs gabo hatho hule maqırhonutho lu tboco froso dıgsonıd u mede dı fris bu taşrorano du bayto di hirutho.

Babacan komır bu zabno qamoyo u gabo mşatsowe cal rınye mşahılfe dmimodiwo u midroşiwo elo bıthır hawi gabo dha farsufo u di iqartheyde mawxa sxir qmu rınyo hiro u qma zedqe noşoye u athro kule dacır laxalaf mıflıf dmişawşıt. Bi maqırhonuthathe mahkele yarixo cal bsirwotho dkıtle u gabo di AKP u mırle athro laybe midabır he ah farsufo u mi iqartheyde.