U athro d’Lebnon cabır lu karanten mi cıltho du virus di Corona

İ şultonutho d’Lebnon fsıqla dmahto u athro baykanoyutho şnızto, bnişo dmaklıyo u virus di Corona dmibarbız zıttır bu athro.

 Mxasra hreto, i nuqazto du hulmono d’Yuldath Aloho b’Beyrut kımdawmo dımcadro a faqire wa sniqoye dhzelın husrono mu kriz momunoyo d’Lebnon, u mcal fothe du furqoco rabo dhawiwo b’Beyrut bu yraho d’Ob dşaficina.

 İ şultonutho d’Lebnon mahıtla u athro b’karanten gawonoyo awkith mnıcla u cboro u nfoqo u mawdacla’ste dgıdmitahıt Lebnon b’aykanoyutho şnızto dgımşaryo 14 bu yarhano, uhol 25 bu yarho, leşan dlo mibarbız u virus d’Corona zıttır. İ şultonutho mawdacla’ste du zabnano kibe dmişawhır lfuth a şuşote du kewo d’Corona.

Bebzabno, i şultonutho mawdacla du bethtawso Emwothoyo d’Beyrut gıdfoyış ftiho lu zawco du fyoro, elo a farsufe dıkhızqi l’Lebnon maçburne dfayşi bu hotel l’zabno d’şabtho. A fusqonani midi athmıl bıthır mu knuşyo dımtayable u mawtbo celoyo du sutoro d’Lebnon bu qusro d’Bcabda, cali qroyto du rişqutno Mişel Caun.

Me gabo hreno, u grub da fulhone di nuqazto du hulmono d’Yuldath Aloho dkıtyo bi Saptiye b’Lebnon, mcadarle 800 farsufe dım’athri ma şartat qaşye di ciyeşe yawmonoyto. İ nuqaztathe kımqadmo mşablonutho du hulmono dıkmisomo fayış b’timone ğalabe celoye mi celtho du kriz momunoyo.

İ nuqazto d’Yuldath Aloho kımdawmo dımfarqo samone awkith darmone la sobe dkıtlın kewe casqe, ukull yarho kmitahwelın samone magon leşan dsaymi u tedawiyathe. Bebzabno, kımqadmo samone la kayiwe du sartono u ksaymo’ste falqo mu tedawiyathe. Camgabıdathe, i nuqazto du hulmono d’Yuldath Aloho mfaraqla 400 fetqe la yaqrotho sniqoye dhzelın husrono bu furqoco d’Beyrut, leşan dşuqlilın darmone magon ma botaysamone.