U athro d’Lebnon u Iraq mdelın qyomo bu haqlo du mazot

Lebnon dıkşufco ucdo b’maşıqlo ğalabe casqo bu haqlo du momuno, mdela qyomo camu Iraq bu haqlo du mazot, leşan dmaxifo ışmo u kriz dkito bu athro.

Mqabıl d’milyon tonat d’mazot i şato mu Iraq, gıdobo Lebnon mal u gıdmaşyo ğer fulhone lu Iraq, leşan dmaxifo i bsirutho dkito bu haqlo du kahrobo bu athro.

Lebnon kışufco bha ma krize rabe du momuno mu zabno du qrobo gawoyo du athro ban 1990. Bı maqırhonutho mşawtafto dfriso athmıl ma wazire du monuno mawdıc, d’Lebnon wu Iraq mdelın qyomo hatho beyn hıdode. Bu qyomano, gıdmaydo Lebnon bi şato milyon tonat d’mazot mu Iraq.

Ubu dawrayde, gıdmotele u Iraq mal uğer snodo me Lebnon. Bu şıkılano, gıdqudro i şultonutho d’Beyrut dmaxifo ışmo u hboso dkito calu camo bu haqlo du kahrobo. U camo Lebnonoyo dıkcoyış adyawma b’kriz rabo u dıshif u momunayde uğer sniqwotho asasi, kıcoyış’ste bsirutho rabtho du kahrobo u kull yawmo kmıqtıc macle u kahrobo ba şoce.

U waziro du momuno d’Lebnon m’akadle, du qyomano dcamu Iraq, gıdmaxıf ışmo i aykanoyutho du athro. U mazot dgımaydo Lebnon, gıdmitıstacmıl la generatore du kahrobo u gıdmakfe l’4 yarhe. U timo du mazotano’ste beyn 300-400 milyone dolare’yo.

U mazot yaquro du Iraq, gıdmişadır l’Lebnon bu darbo da macımlayde du nafto. Mcal fothe di aykanoyuthathe d’Lebnon, ğalabe ma kayiwe b’qento’ne cal da bethkrihe kıfayşi dlo kahrobo wu krizano, xlıqle hboso rabo aclaye u latne hadire, late darmone u alat dqudri dmıstaqbıli heş kayiwe; xıd mathlo di Corona.