24/02/2023

U athro du Ciraq mnıcle u ştoyo, u zebono wu snoco du alkohol bu athro

U Cıraq, mnıcle u ştoyo, u zebono wu snoco du alkohol bu athro. Kull farsufo dgıdoyış u qonunano, gıdmiçaze b’casro milyone dinare; awkith qariwo l’şaw-calfo dolare. İ mawdconuthathe d’sfaryawmo ruşmoyto du athro’yo, dfrısla u qonuno di tagorutho du zebono udu zwono bu athro.

24/02/2023

BOĞDOD — U Cıraq mnıcle ucdo ruşmoyith u tecbiro du alkohol lu athro, u zebonayde, u ştoyayde wu snocayde bu athro wu fusqonano’ste şafıc la haye 20 bu yarhano. Bu fusqonano u hatho kmitawdıc, dkull farsufo dlıkmtabıq u qonunano, gıdmiçaze beyn 10 milyone dinare du Cıraq-dkıtne 6.850 alfo dolare d’Amerika lhol 25 milyone dinare-dkıtne 17.140 dolare.  

Ba 2016’ste sımwole u parlamento du Cıraq quwolo cal rmoyto dmımnıc u snoco du alkohol, elo mqabıl du fusqonayde, mahwe’wo hfuxyo qaşyo ma gabe folitiqoye ubi netiçe lo şafıcwo la haye. Wu ucdo’ste kmıntır du fusqonano, dmaqhır a qalilotho du athro u dmafsıh a gabe tawdithoye da Maşılmone. 

Kito ğalabe şırak bu Cıraq dkıtne hfite bu snoco du alkohol b’Boğdod, Mawsal ubu qlimo d’Kurdistan u gawonoyith u athro-hawi mabuco du snoco udu zebonayde bu Madınho Mescoyo wa dukane du alkohol zayidi.  

Bu zabno du rişono catiqo Saddam, a Maşılmone mniciwo dımzabni alkohol u calathe a dukane bu zyodo du camaydan uda Ezidoye’wın. Elo mi celthathe’ste, midiwo a dukothani nişo la hçome qaşye da Maşılmone tuhmonoye.