U athro du Iraq u d’Mısır sıme ittifaq bu haqlo du nafto

U Iraq u Mısır matın lawyutho, dmaqwın a esorathe bu haqlo du nafto udu ğaz.

 Bi socurutho dsımle u rişizgado du Iraq Ahmed al Dulayimi lu makthbo du waziro du nafto uda mabuce d’Mısır Tarek al Mulla, drışlın u plan du teqwiyo da esore dbeyn hıdode.

A şultonwotho du Iraq udı Mısır kıte plan dmaqwın a esorathe zıtır bu haqlo du nafto udu ğaz. U teqwiyo da esoraniste gıdmisım bu darbo du terkiwo d’şırke mşawtafto dgımbayno tarmıyotho frişe. I sbuthathe drişo, bi ytawto dhawile u waziro du nafto u da mabuce d’Mısır Tarek al Mulla camu rişizgado du Iraq b’Qahira Ahmed al Dulaymi.

Bi maqırhonutho dhuwle al Mulla makadle, d’Mısır u Iraq matın l’awyutho d’Qahira d’zawno 12 milyone barmile du nafto mu Iraq. U qyomanoste ucdo l’zabno d’6 yarheyo u bıthır gıdmihathıth naqla hreto. Mısır mawdaclaste dkıtyo hadırto dımşadro yadıcthone bu haqlo du nafto lu Iraq, leşan u droşo da falohe Iraqoye.

Awkith a şırak du nafto d’Mısır gıdfulhi bu Iraq u gıdmarkıwi şırke mşawtafto leşan u tuyobo da tarmıyotho mşahılfotho bu haqlo du nafto u du ğaz. Bebzabno a 2 mşale matınste l’awyutho, dkito mkono rabo dmişawşıto zıttır i methcadronutho dbeyn da 2 athrawotho dilonoyith bu maşıqlano dkıtyo casqo bu Iraq bu haqlo du şuşoto, du bnoyo udu hethotho du athro.