U athro du Sved mıctarafle dkito mafyat u caşıryotho bu athro

Bi maqırhonutho dsımle u rişono da pwelıs du Sved Mats Löfving dmırle bu Sved kito bu noquso 4 gurube dkıtne caşıryotho bu athro du Sved mabdele droşe qaşye bayn da gabe u mşalo du athro.

Ba mamle dhawın baynothaye u rişwazire du Sved Stefan Löven kımi klozım mimıd tadbire qaşye u howe qonuno qaşye mqabıl da gurubani da caşıryotho dı cabiri b’ğalabe dukothe du athro u di siyase u du momuno, tagorutho da gelone mtanwone, u hiyal da warqe u zuze kome.

Bu tboco froso du Sved adyoma a tebe kdırşi i maqırhonutho dhule u rişono da Pwelıs du Sved dmırle kito zıtır me 40 gurube di mafya dkıtne gurube di iqartho av yaqrotho dkımdabrıne.

U rişono da pwelıs Löfving mahke bkul qrihutho dkito gurube da caşıryotho dıkmote u mınyonathe zıtır me arbi u hani bu zoyudo mane cabiri lu athro du Sved dilonoyith laşan dımşatsi u gurubathe bu athro u dqudri dmıstafdi mu mede dkito bu athro b’darbone lo qonunoye.

A gurube dıkmitahke aclaye gurube dıksaymi hiyal ba warqe bu zebono da gelone mtanwone, bhın dukotho mşataslın mdabronwotho dkıtlın hakımiye aclaye, u bhın mdinotho cabiri bgawe di siyase du athro mathlo ba farsufe dkıtlın ba mawtbe da karxwotho kibın masimi u mede dkıtyo mawthrono li iqarthathe.

A gurubani bu zoyudathe kmidabri me hıdo aw tarte yaqrotho cam hıdode, lfuth u waziro di gawoyutho du Swed Mikael Damberg a gurubani dilonoyith cabiri lu Sved laşan dımalxi a şuğlonathe u dmaydi yuthrone laşan a caşıryothathe.

Bıthır mi maqırhonuthathe dhule u rişono da Pvelıs du Swed u dımakdo mşarelın adroşe qay hul ucdo lo mahke calu medano u mın sim laşan dmitaklın a caşıryothani dcıbri lu Swed u dımtaksi ruhaye bu athro.

Me gabo hreno a gabe du athro mşarelın dı tıhmi hdode u bebzabno kdorşi mın fusqone u qonune qaşye dıklozım mimıd mqabıl da hawbe dıkmisım bu athro.

Kmahwe lu belhude bu madınho mıscoyo kito mıthtaksonutho da caşıryotho dıkmaydi u qonuno b’idothe druhaye, elo bu Svedste kito zıtır me 40 caşıryotho dıksaymi hiyal ba warqe, kımşalhi u camo, kmaydi zuze bu hboso, u bebzabno kmaydi i tagorutho da gelono mtanwone tahte di morutho druhaye.