U bethdino datre rabhaylawotho du rejim d’Suriya kımdawmo

U bethdino datre rabhaylawotho du rejim d’Suriya, kımdawmo heş bu athro d’Almanya. Lfuth aşuşote dhawın bi sbuthathe, ha ma hbişoye d’Suriya dsımiwo teşniqo mu rabhaylawotho msiko Anwar Raslan, shıdle b’gawıd du bethdino d’Almanya.

U sniğro Anwar Albunni bi maqırhonutho dıfrısle bi dafayde du Twiter, mawdacle dıshıdle qum da dayone du bethdino d’Anwar Raslan, udkali fotho l’fotho qum du rabhaylawotho da nistixbarat d’Suriya dsımwole teşniqe l’ışne yarixe bhaq da hbişoye mdinoye ba hbuşye du rejim d’Suriya.

I sohdutho dımqadmole Albunni lu bethdino d’Raslan grışla ter yawme l’zabno d’şeth şoce. Albunni bi sohduthayde mahkele bu şuroyo calu fulhonayde xıd sniğro dkımdafıc a’zedqe noşoye, u aydarbo msıkwo mu rejim d’Suriya u mahıtwo l’zabno d’hammış ışne bu hbuşyo mi şato da 2006 uhuli şato da 2011.

Albunni mathkarle dıhbışwo bu hbuşyo qentrunoyo d’Cadra dıkmidabır mu ferco da 285 da n’istixbarat gawonoye du rejim d’Suriya, u makadle du fercano kmidabarwo mu rabhaylawotho Anwar Raslan dkımdawım ucdo u bethdinayde b’Almanya.

Albunni bi sohduthayde makadle dsımwo teşniqe mu rabhaylawotho Raslan, u mawdacle dıkşomacwo mi qelaytayde a’hawarat wa zacqat da hbişoye dıkmisomiwo teşniqo ba qeloyotho hrene.

Be bzabno, Albunni mawdacle du rejim d’Suriya laybe dfaşwo bi şultonutho zıd m’şato hdo dlo na qatle umu msoko da bnaynoşo.

Camgabıdathe, a’dayone mawdaclın du rabhaylawotho Raslan kımdace dıfliğ mu rejim d’Suriya, elo Albunni rfıdle u medano u mırle “dhowewo şroro dıflığwo mu rejim gıdforaswo bu nquso maqırhonutho awste kthawto bi ido dıkmawdıco dkıtyo baryo mu rejimano uma teşniqe dıksoyım bhaq du camo d’Suriya, elo lışamıcno ulo naqla d’Raslan sımle u medano. U nafıq mu athro bıthır mdırğışle du rejim nafoloyo”.