03/05/2021

U Bethdino d’Suriya maqbele tlotho mraşhe la guboye di rişonutho du athro

U bethdino du nomuso esonoyo d’Suriya, maqbele 3 mraşhe la guboye di rişonutho du athro dıkmıntır dmisomi 26 bu yarhano d’İyor.

Me gabo hreno, bu zabnano dımqarawlın a guboye d’Suriya, huwle u rişathro Başar al Asad şbuqyo l’mınyono dı hbişoye.

Adyawma u bethdino du nomuso esonoyo d’Suriya maqbele ruşmoyith 3 mraşhe rişoye la guboye di rişonutho du athro dgımisomi 26 bu yarhano. Cambabe d’Başar al Asad, mbayın’ste Abdallah Saloum Abdallah u Mahmoud Ahmed Marei. Bu şıkılano, hawi naqla hreto garanti du rişathro al Asad dımdawım bi wolithayde.

Lfuth a tebe dfrisi, hol 51 farsufe mraşahwolın ruhaye a guboyani; beynothaye 7 neşe. Hathe gıdhuwyo u dawro dan 4 naqlat d’al Asad-dheş ma 2000 kımdabır u athro bıthır mıd u babo mhasewo wu dımdabarwole Suriya bu inqilab dan 1970. Mi şato da 2011 uholucdo’ste, u athro b’kriz rabo’yo elo al Asad lıkmaslım u kursiyayde. Leşan ha dımraşıh ruhe la guboye, klozım dcoyış b’Suriya zabno d’10 eşne.

Wa bnaymothoye saqıbloye dkıtne bi golutho, lıkowe dımraşhi ruhaye la guboyani uba zabno haroyani’ste msik mınyono d’saqıbloye dmawdaclın da guboyani latne qonunoye. Bebzabno mşale frişe dbritho u Emwotho Mhaydotho’ste kımawdıci du tuyobo da guboye bu zabnano latyo triso u calathe laybın dhowın qonunoye.

Me gabo hreno, ba kmo şabani d’meqım ma guboye, huwle al Asad şbuqyo l’mınyono d’hbişoye dımsikiwo ma thome du froso d’mawdconwotho fawdo, dkıtne nacime bu cımro aw dsımlın camle di marhıbonutho lfuth u rejim. Al Asad leşan dqomır snodo mu camo, kobe şbuqyo la hbişoye uba guboye d’meqım’ste sımwole cayni mede. Elo a hbişoye folitiqoye lıkmitahwelın şbuqyo ubi sbuthathe mahwe hfuxye qaşye.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…