U Bethdino du Iraq lkobe aftho me hatho dmitacmıro i cito d’Al Tahira

Mabuco mi cito Suryoyto Qatholiqoyto d’Mawsal, mawdacle da fulhone du bnoyo u hethotho di cito d’Altahira kibe dmişawhıri. Lfuth u kohno di cito Suryoyto d’Mawsal, i celtho du şuhorano cal du bethdino Iraqoyo lımıdle fusqono dıkmawdıc du tehriwo di cito d’Altahira athi luhwoyo bi netiçe da hçome dsımle u tukoso marıhbono dı Dacış.

U kohno di cito d’Altahira da Suryoye Qatholiqoye di mditho d’Mawsal qaşişo Ammanuel Gallo, bi maqırhonutho dhule li dafo d’Ankawa mırle “u bethdino dilonoyo d’Mawsal mu şuroyo di şato dşaficina uhul ucdo lımbayanle u fusqonayde bi sbutho du tehriwo di cito d’Altahira hawi bi netiçe di marıhbonutho da grube dı Dacış yo”.

Qaşişo Ammanuel bi maqırhonuthayde grışle u zuhoro calu fusqono dmıdwola Emwotho Mhaydotho dgıdmaydo calruha a’fulhone du bnoyo u hethotho di cito d’Altahira da Suryoye Qatholiqoye wi cito Latinoyto da n’abohe Domenikan bı Mawsal, wa fulhonani kmisomi bi sdirutho dcamu athro da İmarat Caraboye Mhayde. Elo be bzabno qaşişo Ammanuel mawdacle da fulhonani kibe heş dmişawhıri cal du bethdino d’Mawsal lımıdle fusqono haroyo dıkmawdıc dı Dacış yo dıshıfle a’citotho du camaydan bi mditho.

U bethdino du Iraq hul ucdo b’furşono kımqadım lafu camaydan u Mşihoyo, wu medano kmahwe qrihoyith bu fusqono dmıdle u bethdino bi sbutho da fulhone du bnoyo u hethotho du masığdo d’Alnuri bı Mawsal dkıtyo ha ma masığde rabe di mditho. U bethdino du Iraq lımşawhır bu fusqonayde dıkmawdıc du masığdo d’Alnuri shif bi netiçe da hçome marıhbone dı Dacış, u mawxa ste a’fulhone du bnoyayde m’hatho mşarelın bu şuroyo di şabtho dşaficina.

Bu yarho dı Teşrin u Haroyo di şato da 2019, u athro da İmarat Caraboye Mhayde wu tukoso d’Unesco d’Emwotho Mhaydotho, mawdacwolın dgımcadri hdode bi sbutho du insiyativ du bnoyo u hethotho da nuqazyotho marduthoye u tawdithoye di mditho d’Mawsal.