U bethdino d’Yurdnon hkımle tlotho farsufe lu mawto cali asirutho dhawilın cam Dacış bu qatlo d’ışto folhe da hayle di mşaynutho

Athmıl u bethdino d’Yurdnon hkımwole 11 farsufe b’çazawat frişe-hın mçazın 5 eşne hbuşyo u hın l’25 eşne uğer’ste hkimi lu mawto. A marhıbonani kulle maşelın furqoce u hçome cala radoyotho ucala bınyone du polis uda hayle da istixbarat du athro.  

3 marhıbone mçazın lu şnoqo cali sawco dkıtwolın ba hçome dsımwole u tukoso marhıbono d’Dacış ubu qatlo d’6 ma hayle di mşaynutho d’Yurdnon bu yarho d’Ob da 2018. Bu hçomano, qtiwolın a marhıbone 2 powelıs u mçarahwolın 6 hrene b’furqoco d’radoyto du polis bi arişkoyto Camman.  

Bıthır yawmo, qtılwo naqla hreto 4 powelıs b’furqoco dsımwo qum bınyono bi mdito d’Al Salt. Almanya’ste hani zabno kımaşyo bethdine d’marhıbone dımsiki bu cborathe lu athro. Athmıl u bethdino d’Berlin, hkımle Fleştoyo Suri cımre kule lu hbuşyo cala hawbe du qrobo dsımwole bu yarho d’Odor da 2014. 

U farsufano-Mouaffaq Dawa, dkıtwe hadomo bu Zawco di Hirutho da Fleştoye dkıtyo noqufo lu rejim d’Suri’a, qtiwole 7 farsufe bi maşritho d’Yarmouk. U tukoso marhıbono d’Dacış dheş kımşakıl qento, mid’ste naqla hreto nişo la cuqobe da hayle oyaroye du Cıraq. Bu cuqobo oyaroyo dsim b’Salahaddin, qtile u gayso 5 marhıbone d’Dacış.