U Bethdino Hollandoyo hkımle marhıbono du Gbino d’Al Nusra
Bethdino Hollandoyo, hkımle marhıbono du Gbino d’al Nusra l’20 eşne hbuşyo ma hawbe du qrobo.
Bıthır ma ithbate dımqafın calu marhıbonano, m’akıd dqtiwole folho du rejim d’Suriya qum du nahro d’Froth ba 2012.
Athmıl bethdino Hollandoyo, hkımle u marhıbono du Gbino d’al Nusra-Ahmed al Xıdr l’20 eşne hbuşyo. U marhıbonano dkıtyo cımre 49 eşne, bşıkıl barbroyutho qtiwole folho du rejim d’al Asad. Hathe da 3 naqlat’yo da botaydino d’Hollanda kıhukmi marhıbone d’Suriya ba hawbe du qrobo.
Elo a hrene d’hkimi’ste, qayıthwole belhude lhol 7 eşne hbuşyo. Bıthır ma buhone dsımwole u polis Almanoyo ucal tayp du qolo uğer ithbate hrene dkıtwole, m’akıd du marhıbonano qtiwole u folho du rejim qum du nahro d’Froth ba 2012.
A dayone du bethdino d’Hollanda mırlın; U qatlo d’yasiro du qrobo-latyo belhude hawbo du qatlo elo dyoşoyo’ste cala qonune Emwothoye uda zedqe noşoye. U marhıbono al Xıdr, ba 2014 azzewo l’Holland u qayıthwole galwoyutho zabnoyto.