U Bethdino hule fusqono calu qatlo d’Rafiq Al Hariri

U bethdino Emwothoyo dilonoyo dsim b’Den Haag calu qatlo du rişwazire catiqo d’Lebnon Rafiq al Hariri, mıdle fusqono bhaq du hadomo d’Hizballah Salim Ayyash.

Ayash hkımwo heş bu yarho d’Ob, dhawile sawco bu qatlo du rişwazire Lebnonoyo ba 2005, u bu fusqono hatho dmid athmıl, u hayobo mjaze 5 naqlat cımre kule lu hbuşyo.

U tribunal u bethdino dilonoyo dıkmısnıd me Emwotho Mhaydotho, dhani eşne kımcaqıb u qatlo du rişwazire catiqo d’Lebnon Rafic al Hariri, mıdle athmıl fusqono haroyo bi dacwathe d’Al Hariri. U bethdinano d’Al Hariri dkıtyo b’Den Haag d’Hollanda ışme The Special Tribunal for Lebanon, hkımle ha ma hadome rişoye du gabo d’Hizballah, bu qatlo d’Al Hariri.

U hayobo d’Hizballah Salim Ayyash dıhkımwo heş bu yarho d’Ob bi sawco dhawile bu qatlo d’Rafiq al Hariri ba 2005, hkim athmıl mu bethdino d’STL, 5 naqlat cımre kule lu hbuşyo ma 5 hawbe frişe dsımle; beynothaye hawbo di marhıbonutho u du qatlo.

U hayobo Ayyash latyo msiko u noşo lıkodıc haykoyo, wa 3 thimoye hrene marfanwo mu bethdino bu yarho d’Ob d’şafıcina. U maşıqlo di kinutho dcalu qatlano yarıx ğalabe, cal du remzo di DNA dmıdwo mu furqoco dhawiwo celtho lu qatlo d’al Hariri 14 Şbot da 2005 kımadıl dkıtwe gabro dımfarqacwole ruhe elo lo qadiri dımakdi i hiyoyuthayde.

İ sbuthathe xlıqwola kriz camuqo b’Lebnon mcal fothe di saqıbloyutho dhawyowa beyn da gabe frişe du athro. Rafiq al Hariri dkıtwe Sunna, tagoro catirowe u sımwole i rişwazirutho d’Lebnon 5 naqlat bıthır mu qrobo gawoyo du athro ban 1975 u hola 1990.