06/01/2023

U Bethdino Nomusoyo d’Turkiya maklele i mcadronutho zuzonoyto di HDP

U Bethdino du Nomuso Esonoyo d’Turkiya hule fusqono zabnoyo dmakle i mcadronutho di Khazina di dawle dıgmitahwiyo lu Gabo Demoqratoyo da came HDP. U bethdino hule zabno d’yarho l’HDP leşan dımdafıc ruhe. Lfuth du medano gıdhitahwe u fusqono haroyo.

06/01/2023

ANKARA – U rişmqimdino di Qutnutho du bethdino du Nomuso Esonoyo Bekir Şahin bi hıjje “a zuze dıkmitahwın l’HDP kmitıstacmıli larwal du gabo u kmitahwın l’nişe dkıtne larwal du qonuno, mqadamle u renyo du tekliyo di mcadronutho.

İ sbuthathe dıdrişo, b’7 qole dmırlın LO 8 qole dmırlın E mid fusqonano du teklido di mcadronutho. Bıthır mıd HDP dımdafıc ruhe, gıdmitahwe u fusqono ya kamiloyith dıgmitakliyo i mcadronutho yaste gıdmitaqım u tejmido dmahıt cali mcadronutho.

A gabe dıkşıfci u masxoro da 3% u du parlamento i khazina kımqadmo mcadronutho. Bu tarano klozım 10 bu yarhano dmitahwewo 179,8 malyune lirat l’HDP. Bıthır mıdıgmitahwe fusqono da guboye, kibe HDP dmoyıt 359,5 mılyune lirat mi khazina.

Bi maqırhonutho dhiwo m’HDP calu fusqonano mir “hano amro dhiw mi şultonuthoyo, u tehito di ido d’zedqoyo. U fusqonano kole qamuthıd du maşıqlo da guboye dhowe b’kinutho u b’demoqratoyutho. Wu fusqonano kule qamuthıd du sıbyono du camo. Elo u medano laybe kole qamuthıd du veyoco di şultonutho uloste kibe dkole qamuthıd du qmoraydan.”

U rişono zawgoyo dmeqım Selahattin Demirtaş dkıtyo bu hbuşyo bi maqırhonutho dhule calu fusqonano mırle “HDP latyo fako d’lahmo dkibe dmıblıc xayifo. İnaqa dıbcitu dbılcitulle gıdcose bı qdolayxun u gıdmıhnoqitu buwe.”