U cadcido du Slibo dımtayabwo bi qastra dı Tellısqof di daşto d’Ninwe mkamele ucdo a hfitwothayde

U cadcido du Slibo mqadşo dımtayabwo bi qastra dı Tellısqof di daşto d’Ninwe, mkamele ucdo a’hfitwothayde.

Camgabıdathe, mtayıb turnuwa di esfireğlo di cito d’Mort Mari bi qritho d’Hazarjot bi daşto d’Ninwe.

 Bi cohnutho du cedo du Slibo mqadşo, i marcitho di cito Kaldoyto d’Mor Gorgis bi qastra dı Tellısqof di daşto d’Ninwe, mtayabla cadcido rabo dkıtwole tahrazto catırto ba hfitwotho ruhonoye, du sport udi amnorutho. U cadcidano dımtayabwo 6 bu yarhano, lumıhreno mkamele a’hfitwothayde dmıştawtaflelın menyono celoyo mu camaydan ma qıryawotho u fenyotho mşahılfe di daşto d’Ninwe.

Bu cadcidano, mtayıb slawotho u zuyohe ruhonoye u ramşitho d’qole citonoye dmıştawtaflela menyono ma gude du koral da citotho di daşto d’Ninwe. Camgabıdathe, i sictho du sprot di marcitho d’Mor Gorgis, mtayabla turnuwa di esfireğlo şbicoyto dmıştawtaflela tmone gude di marcitho. Bu muroyo haroyo, i gudo d’Mor Afrem qamiro u koso di turnuwa di esfireğlo bıthır mıdqamiro tlotho mqabıl dı tre ğolat dımhalqila i gudo di claymutho d’Mor Gorgis.

Mxasra hreto, ubi mdabronutho du rişhsayo di marcitho d’Mawsal ud’Caqra di cito Kaldoyto Mor Nejib Mixayel, athmıl casriye sim u futoho di tunuwa qamayto di esfireğlo d’Mort Mari dıkmitaybo bu hudro di Hubo bi qritho d’Hazarjot bi daşto d’Ninwe.

Li turnuwathe kmıştawtıf 12 gude du camaydan di daşto d’Ninwe, baynothaye i gudo d’Nala, Hazarjot, Alqoş, Baxıtme, Şexan u Xuyada.

Meqım mıdmisım u muroyo du futoho, a’12 gude di esfireğlo mtayablın zawho b’gawıd du hudro, ubıthır sim mamlo mu xuroyo Farid Gorgis Kina umu mgabyo di qritho d’Hazarjot Yusıf Bınyamen.

U muroyo qamoyo dımtayıb bayn di gudo d’Hazarjot wi gudo d’Alqoş, tayım bu qmoro di gudo d’Hazarjot dımhalaqla arbıco ğolat mqabıl dı tre li gudo d’Alqoş. Wu muroyo trayono tayım bu qmoro di gudo d’Nala b’hamşo ğolat mqabıl dlo mede li gudo d’Alşexan.