U Cedo d’Akitu lımcayıd bu Iraq

U camaydan dıkhoye bi daşto d’Ninwe bu garbiyo du Iraq, adşato lo mıştawtafle la hfitwotho d’Ha Nison-i Rişe d’Şato umthoyto d’Akitu, cal di şultonutho du qlimo d’Kurdistan bi sbutho du virus d’Corona, sxırla a darbone wa tarce da thume du mazlo u mathyo beyn da mdinotho u qıryawotho di daşto.

U gabo du Huyodo d’Bethnahrin Athroyo du Iraq, fsıqwole dımtayıb adşato’ste hfitutho camoyto bi daşto d’Ninwe, bi cohnutho di şato Bıbloyto Suryoyto Othuroyto d’Ha Bison dan 6 alfo u 771.

İ hfituthathe gıdmitaybowa cam halxo bu turo d’Al Alfaf bu wahdo dkıtyo mqabıl di dayro d’Mor Matta da Suryoye Ortodoksoye bi daşto d’Ninwe. Elo i şultonutho d’Arbil bi sbutho da tedbire dmıdla mqabıl du virus di Corona, sxırla a darbone du mazlo u mathyo du camaydan beyn da mdinothayde bıgawe di daşto, ubu şıkılano mahıt mnoco qum du camaydan dımıştawtıf la hfitwotho d’Ha Nison.

U mede dıkgorış u zuhoro, qay a tedbire di Corona belhude kşıfci calu camaydan, elo a Kurdoye du qlimo lo mtahıtwo mnoco qumaye bu zabno dımcayadiwo u cedathe du Newroz u mtayablın’ste hfitwotho bu qlimo d’Kurdistan. Kımahwe u virus di Corona belhude lu camaydan ktofe ulo la Kurdoye u yaste kito nişo bıthre du qedomano dlatyo qriho u dkıtyo tuhmonoyo.