U Cıraq m’akadle cali sniqutho du fyoşo da hayle du koalisyon Emwothoyo b’Suriya

Dafo di Scudiye sımla athmıl maqıblonutho camu waziro du sutoro du Cıraq Thabet al Abbasi dım’akadle cali ulsoyutho di ithutho da hayle du koalisyon Emwothoyo dkıtyo bi rişonutho d’Amerika u dkobın ağono mqabıl da qente dıkmşakıli a krılyotho du tukoso marhıbono d’Dacış cali mşaynutho b’Suriya.

İ maqıblonuthathe dsimo camu waziro du sutoro du Cıraq, athyo lu hwoyo bu duxrono şatonoyo da 11 eşne dkbışwole u tukoso marhıbono i hiğmonutho d’Ninve. Al Abbasi dgrışle u zuhoro cali maşritho d’al Hol b’Suriya dıksaymo baytoyutho la yaqrotho da marhıbone d’Dacış u dheş kımdawmo dımşaklo qento rabo lu Cıraq.

Bi sbuthathe’ste al Abbasi mawdacle d’Boğdod tlıbla me Darımsuq-bu darbo d’Turkiya, dsuxro i maşrithathe dkiba’ste mınyono celoyo d’marhıbone nuxroye dkıtne man athrawotho d’Urifi. A Urifoye krufdi dnuqli a bnaymothoyathe mi maşrithathe Suriya. Calathe u waziro mırle; U Cıraq kısonıd kamiloyith, du koalisyon dımdawım u ağono dkobe mqabıl di marhıbonutho.

Calu groşo du koalisyon mu Cıraq al Abbasi mawdacle, d’Boğdod heş lo matila egartho ruşmoyto calu plan du groşo da hayle du koalisyon. Bu huthomo u waziro Thabet al Abbasi mawdacle dhın ma qentrune folhoye du koalisyon Emwothoyo kmıntır dmitaxlın bi harayto du yarho d’İlül u dmitaslımi lu qlimo d’Kurdistan u Cıraq lo matile signale me Amerika, dıkmadili cal şuhlofe bi siyasayda u loste kito talab, dmitazido i ithuthayda bu Cıraq.