23/02/2023

U Ciraq sımle qroyto dmitabde diyalog jıddi cam Ankara, bnişo dmiqafe şroyo lu kriz da maye udi naşifutho da nahre

Mi celtho di bsirutho di kmoyutho da maye dıkmaxrolın Turkiya la n’athrawotho şbobe, i şultonutho du Ciraq sımla qroyto dmitabde diyalog jıddi cami şultonutho d’Anqara, bnişo dmiqafe şroyo lu kriz da maye udi naşifutho da nahre.

BOĞDOD – U mawtbo di mşaynutho athronoyto du Ciraq dkımrayşanle u rişwazire Muhammad Şiyac Alsudani, sımle qroyto dmıftıh diyalog cam Turkiya bi sbutho du kriz da maye. U krizano i celthayde Turkiya yo dıkbınyo masxore rabe, ukmanqıso a’maye da nahre dıkxayri la n’athrawotho şbobe, baynothaye Turkiya.

U makıthbo du tboco froso d’Alsudani, mathkarle du mawtbo di mşaynutho athronoyto du Ciraq bu knuşyo dsımle, drışle menyono d’sebwotho, baynothaye u şroyo da qetre dkito bi sbutho di aykanoyutho di zaricutho udu kyono, u hathe ste mi celtho di bsirutho rabtho da maye dkothın mi xasra dı Turkiya, mawxa ste u mawtbo di mşaynutho athronoyto makadle dıklozım dmitabde diyalog cam Turkiya bi sbuthathe.

U Ciraq mi şato da 2003 uhul ucdo, kloqe kriz qaşyo da maye mi celtho di bsirutho da maye da tre nahre dı Deqlath udı Froth. U Ciraq kmatcın Turkiya wu İran i mşalutho du krizano, uktohamlın dkımmaşın siyase bceldboboyto mqabıl dide, cal dıkbonın masxore rabe, kımşahılfi u darbo dkımhalxi ebe a’maye da nahre, ulıkmafiti la haye a’qyome emwothoye dkımbayni u sahmo da maye du Ciraq.