08/02/2023

U Federasyon da Hudre Suryoye-SUDEF, mhaydarle qamyon malyo bataniyat u lbuşe, leşan dmişadri l’Antakya u Adiyaman

Bıthır mi zalzale dımhewola a mdinotho d’Turkiya u d’Suriya, a şutose du cameydan fayiti li harake leşan dımşadri mcadronutho la sniqoye. Cala mcadronwothani ucdo u Federasyon da Hudre Suryoye-SUDEF, mhaydarle qamyon malyo bataniyat u lbuşe, leşan ramhıl dmişadri l’Antakya u Adiyaman.

08/02/2023

MIDYAT, Turkiya – Bıthır me tarte tahrazyotho dsimi b’Suroyo tv u dmaltım zuze la sniqoye dhzelın husrono bi zalzale dhawyo, u Federasyon da Hudre Suryoye zwınle bataniyat u lbuşe leşan dmitawbli la dukotho dkito sniqutho.

Beyn da şutose dgımşadri mcadronutho me Turabdin la dukotho di zalazale kito u Slibo Suryoyo di mcadronutho, ADFA u şutoso du Şlomo u Şayfayn cami mcadronutho d’SUDEF.

Lfuth i mawdconutho dmatilan ma dukotho di zalzale, u husrono ğalabe raboyo u ba mele laybe dmitahke, u camo latle dukotho dfoyış u latle muklo, lbuşe şahine u ğer sniqwotho yawmoye. Bi sbuthathe a şutose di mcadronutho ksaymi qrayto lu cameydan ula şutosayde, dsındi hıdode u dımcawni u camo dhzele husrone ba dukotho di zalzale b’Suriya u b’Turkiya.

Lfuth i mawdconutho dmatilan mi Gozarto d’Bethnahrin kmihaydır grubat di dgımawbli mcadronwotho lu cameydan dhzele husrono b’Holob uba dukotho hrene d’Suriya. Adyawma’ste hazoye u şomuce myaqre gıdhowelan naqla hreto tahrazto cali zalzalathe ucala husrone rabe dtrela b’Turkiya u b’Suriya, bıthır ma tebe di şoctho da tmone dcasriye.