U gabo d’Altayyar Alsadri tırele dmitadcır 38 bote du cameydan u da Sabiaa Mandoye la morathe

 U gabo d’Altayyar Alsadri du Iraq, mawdacle dhul 40 bote u arcotho kbişe du camaydan u da Sabiaa Mandoye, madcıri la morathe.

 Altayyar Alsadri dkıtyo gabo da Maşılmone Şica du Iraq dqadır d’soyım u mede dılo qadiro i şultonutho dsaymole holucdo, sbutho dıkgurşo u zuhoroyo.

 U hadomo bi mdabronutho du gabo d’Altayyar Alsadri du Iraq Hakem Alzamili, mawdacle d’38 bote u arcotho dkıtne mulkone du camaydan uda Sabiaa Mandoye, madcıri ucdo la morathe. İ dawsathe mhalqo bu taro da fulhone di sictho dımşatsole u rişono du gabo Muqtada Alsadır, bnişo dmitadcıri a mlkone kbişe la morathe a Mşihoye u Mandoye.

Alzamili dkıtwe u rişono di sictho di mşaynutho udu sutoro bu parlamento catiqo, mırle athmıl l’dafo Iraqoyto; İ sictho dımşatsowa bu amro d’Alsadır leşan dmitadcıri a mulkone da Mşihoye uda Mandoye, meqım zabno mabdewola a fulhonayda. U adyawma mşarelan dmadıcrina 38 bote, benyone, u arcotho la morathe.

Bebzabno, Alzamili mawdacle dkito hayle, gabe, grube mzayne u mafyat dıkıbşi a mulkonani ma 2003, wi şultonutho du Iraq lo qadiro dmadıcrolın. Mawxa u mede dıkgorış u zuhoro du gabo d’Altayyar Alsadri’yo dmakşarle b’zabno karyo bu tedciro da bote udan arcothani la moraththe, u mawdacleste gıdmdawım bu tedciro da mulkone hrene lu camaydan ula Sabiaa Mandoye du Iraq.

U rişono du gabo d’Altayyar Alsadri Muqtada Alsadır, 2 bu yarho d’Konun u Qadmoyo dşaficina, huwole amro dmişatıs sictho leşan dımcaqbo i sbutho da bote uda arcotho kbişe du camaydan. U huwole şudoyo dgısoyım huwe farsufoyith u duyoqo da fulhone di sicthathe, u dmimıd tedbire qaşye mqabıl da hayobe. Bıthır kmo yawme, u makıthbo d’Alsadır sımwole qroyto la Sabiaa Mandoye dımqadmi hınne’ste şkuwat bi sbutho da mulkonathe dıkbişi me hın hayle yaste farsufe.