U gabo d’Bethnahrin Demoqratoyo du Iraq mahwele u hfuxyayde mqabıl du rişono du qlimo d’Kurdistan Neçirvan Brazani

U gabo d’Bethnahrin Demoqratoyo du Iraq, mahwele u hfuxyayde mqabıl du rişono du qlimo d’Kurdistan Neçirvan Brazani, cal dlo qrele la gabe u tukose du camaydan dımşadri mathlone lu knuşyo dsımle cama gabe folitiqoye du qlimo u cama came umthoye dıkhoyın ebe.

U gabo d’Bethnahrin Demoqratoyo bi maqırhonutho dfrısle lu tbocofroso mawdacle, du qedomano dyoşo’yo mi şultonutho d’Arbil cala gabe u tukose du camaydan dlıkmiqadamlın b’iqoro u b’şıkıl jıddi.

 Bu insiyativ du rişono du qlimo d’Kurdistan du Iraq Neçirvan Brazani, athmıl mtayıb knuşyo la gabe u tukose folitiqoye ula came umthoye du qlimo. Bu knuşyano dsim bu benyono di rişonutho b’Arbil, drişi sebwotho dkıtlın asirutho camu ctidutho du qlimo, i hdoyutho du mamlayde u folitiqoyo wa esore du qlimo cami şultonutho d’Boğdod.

Elo lu knuşyano, lo mşadır zminutho la mathlone da gabe u tukose umthoye du camaydan, beynothaye u gabo d’Bethnahrin Demoqratoyo, bnişo dmitaşmıc u qolo du camaydan u dmitahwiyo i klayto dkıtle ba sebwotho rişoye dkıtlın asirutho bu dactid du qlimo.

Calathe u gabo d’Bethnahrin Demoqratoyo mawdacle dhawxa knuşyo dıkmıdroşi ebe a zedqe wu dactid da came umthoye kulle du qlimo, klozım dhowewo ebe şawtofutho me mathlone da gabe umthoye du camaydan u Kaldoyo Suryoyo Othuroyo’ste, elo u mede dhawi dyoşoyo calu camaydan u qedomo lo jıddiyo la  gabayde dhulın ağuno u dmıştacelın dawro rişoyo meqım u bıthır mu şekolo da şutose ruşmoye du qlimo d’Kurdistan.

Bebzabno, u gabo d’Bethnahrin Demoqratoyo bu huthomo di maqırhonuthayde, sımle qroyto la mdabronwotho du qlimo dilonoyith i rişonutho dkıtyo mtaltho la gabe kulle, dımqadmi b’iqoro lu ağuno dhule u camaydan, udlo midış u dawro dkıtlın a gabe folitiqoye du camaydan dilonoyith ba sebwotho dcali ctidutho du qlimo. U gabo d’Bethnahrin Demoqratoyo mawdacle’ste du dyoşano kım’athır b’şıkıl mrimono cala timoyotho di şawtofutho şarirto ucali ciyeşe di ahonutho dkito beyn da came u tawdiyotho mşahılfe du qlimo.