U gabo d’HDP mbayanle tahrazto dyotuw cama gabe kulle

U gabo Demoqratoyo da Came HDP, mabdelın tahrazto leşan du şroyo da qetre dkıtla Turkiya.

 U gabo d’HDP leşan dmiqafe şroyo lu qetrano, ktolıb ytawyotho cama gabe du athro kulle dkıtne bıgawe u larwal du parlamento, leşan dı dorşi aydarbo kibın dmawfıqi u athro mu kriz dıkfoyıt ebe.

 Bi mawdconutho dhule u tahlufo du rişono du grub d’HDP dkıtyo bu parlamento d’Turkiya Saruhan Oluç mırle; Ahna xıd gabo gıdayqina u tarco da gabe kulle du athro, leşan dorşina i aykanoyutho d’Turkiya u mışkıl kiban dşorina a qetre dkıtlan.

U gabo d’HDP bu yarho d’Ob mawdacwole i tarmitho dımbayanle me 4 nuqze leşan du şroyo du qetro du athro. İ tarmithathe dmahıtlın ışma i tahrazto sucronoyto du şlomo. Oluç bi maqırhonutho dhule mırle; Atre rişone zawgoye d’HDP sımlın socurutho lu rişono catiqo Selahattin Demirtaş dkıtyo yasiro siyasi bu hbuşyo d’Turkiya u drışlın acme a renye dkıtle leşan u dactid d’Turkiya.

Calu şuwolo da tebe dıkmdacın Selahattin Demirtaş kobıc dfotıh gabo hatho Oluç mırle; Layto hawxa mede, metul dhiye sımle rişonutho lu gabo d’HDP u hol ucdo kfolığ a renye dkıtle acmeyna. U rişono catiqo Demirtaş kul naqla kfolığ a renye dkıtle lu şlomo du athro acmayna u camu tboc ofroso. Hathe meqımste samwola u ucdoste ksamla, latyo mede nuxroyo aw hatho.

Oluç bu mamleyde mırle; İ sbutho d’Turkiya bu dialog kmışre lo bu zayno u bu qrobo. Mawxa ahna mabdelan i tarmithathe d’yutwina cama gabe kulle leşan dımqafena darbo lu şroyo da qetre du athro.