U gayso d’İsroyel sımle hçomo cal şutoso stratijikoyo ucal nuqazyotho folhoye d’Hizballa bi fnitho d’Albiqac bu athro d’Lebnon

ISROYEL / LEBNON – U gayso d’İsroyel sımle athmıl blalyo, hçome cal nuqazyotho du benyono tahtoyo b’gawıd d’şutoso stratijikoyo du snoco udu teltimo da zayne di milişya İranoyto d’Hizballa bi fnitho d’Albiqac bu athro d’Lebnon. 

Lfuth u buyono du gayso İsarloyo, a’haylawotho İsarloye bi netiçe du duyoqo dıksaymi, maglelın liholo d’Hizballa kımnase m’hatho dmaqwe i şkihuthayde wa tahrazyothayde b’gawıd du şutosano. 

U buyono İsarloyo mathkarle ste da fulhonani d’Hizballa wi şkihutho da zayne ba fenyothani, kımmathıl dyoşo qriho la fhome dkito bayn d’İsroyel u Lebnon. 

Bebzabno, u gayso İsarloyo hçımle cal nuqazyotho du benyono tahtoyo folhoyo d’Hizballa bi fnitho d’Sarifa bu taymno d’Lebnon. 

M’gabo hreno, a’haylawotho zabnoye d’Emwotho Mhaydotho dıknıfqi moro lu şlomo bu taymno d’Lebnon Unifel, mawdaclın dkımdawmi dımşaçci u gayso İsarloyo dmıgrış kulonoyith ma n’arcotho d’Lebnon. Unifel mawdacla ste di şkihutho du gayso İsarloyo bu garbiyo du xtuto zarqo du nahro d’Allitani, kımmathıl dyoşo lu fusqono emwothoyo da na’1701. 

U rişono du qlimo macırboyo du haylo d’Unifel rabhaylawotho Nikola Mandolisi mırle “a’haylawotho d’Unifel fayoşene, u gdımdawmi bu snodo da kenşe bu taymno d’Lebnon. I sdirutho dacmu gayso Lebnonoyo qwithoyo, ukımdawmina dsındinale bu froso da haylawothayde, bnişo dhowela i şultonutho d’Lebnon şalitutho bu taymno”.