U gayso d’İsroyel tlıble adyawma ma comure di mditho d’Rafah, Ğaza, dmaxlın i mditho kula, bnişo dlıhozın husrono bi netiçe da hçome dgıdmisomi cal Hamas

U malolo du gayso d’İsroyel Avixay Adırci bi maqırhonutho dıfrısle adyawma bi dafo d’X mırle “ktılbina ma comure du qlimo d’Ğaza dkıtne ba fenyotho d’Rafa(h), ba qastrat d’Alnasır, Alşawka, uba fenyotho qlimoye madınhoye u macırboye udkıtne ba şawthawotho d’Alsalam, Almanara u Qizan Alnajjar dmaxlın a’dukothaththe b’şıkıl kulonoyo”. Adırci bi maqırhonuthayde mawdacle du gayso İsarloyo gıddocır lu qrobo b’haylo qaşyo ğalabe laşan dmatım udqoşıc a’mkone dkıtle u zawco d’Hamas ba fenyothani. 

Adırci camgabıd du zuhorayde frısle ste xarita dıkmagılyo cala fenyotho dıtlıble ma comure d’Ğaza dmitaxlın baroyo, u mırle “klozım baroyo dnıqlitu ruhayxu la maşıryotho dkıtne bi fnitho d’Almawasi”. 

M’gabo hreno, u makıhtbo du rişwazire d’İsroyel bu buyono dıfrısle adyawma, mawdacle dbıthır mıdsim maqıblınwotho rwihe cam şawco mraşhe dıkşowın udkıtne morıd d’mkone rabe, u rişwazire Bınyamen Netenyaho fsıqle dımbayın u rişono catiqo du haylo du yamo rabhaylawotho Eli Şarvit rişono hatho lu şutoso di mşaynutho gawoyto d’Alşabak. 

Lfuth u buyono dıfris, u rabhaylawotho Şarvit dkıtwe mşawtbo, mşabele u gayso İsarloyo l’zabno d’36 ışne, baynothaye hammış ışne xıd rişono du haylo du yamo.