U gayso d’Turkiya ksoyım hçome cal Nahla u Nuhadra bu Iraq

U gayso kaboşo d’Turkiya sımle hçome oyaroye udi naşfe cal hın qıryawotho dıknufli ba fenyotho d’Nahla ud’Nuhadra bu garbiyo du Iraq.

Camgabıdathe, Turkiya manhatla grub d’folhe bu turo d’Gare bu garbiyo du Iraq, ubi netiçe da taxtuşe dhawilın camu gerilla di PKK, qtil u mçarıh menyono dfolhe.

Athmıl bıthır mıd mawdacla i wazirutho du sutoro d’Turkiya dgımabdiyo hçome folhoye hathe calu gerilla di PKK bu garbiyo du Iraq, a tayosyothayda du qrobo hçımlın b’qaşyutho cal menyono d’fenyotho du qlimo. Adyawmaste, a tayosyotho d’Turkiya hçımlın cala fenyotho d’Nahla bi qastra d’Akre, u cal hın qıryawotho dii qastra d’Jamanke bi hiğmonutho d’Nuhadra.

Camgabıdathe, i wazirutho du sutoro d’Turkiya mawdacla dımşadarla adyawma ba şoce d’safrayto Helikopter lu turo d’Gare, u manhıt folhe. Lfuth u tboco froso di PKK, kımdawmi ucdo a taxtuşe beyn du gerilla uda hayle kaboşe d’Turkiya bu turo d’Gare. Cali netiçe da taxtuşani, mşalo di PKK bi maqırhonutho dhuwle, mawdacle du gayso Turkoyo jbir dmıgrış mi fnitho bıthır mıd qtil 9 ma folhayde. Elo i wazirutho du sutoro d’Turkiya mdacela dıqtil 3 folhe u 4 hrene mçarhi ba taxtuşe dheş kımdawmi.

Mxasra hreto, u Mawtbo di Mdabronutho yothoyto Demoqratoyto d’Şigur bu buyono dfrısle krıhle a hçomani d’Turkiya cal Gare, u mawdacle du hçomano hçomoyo’ste cali fnitho d’Şigur. U buyono mawdacle du rişono du rejim Turkoyo dewam yo la qtolğenso dsımwolın a Cuthmanoye bhaq da Ezidoye, u mırle; Erdoğan kobıc dmafıt i tahrazto dkıtle bu dorano da 21 bi mcadronutho da marhıbone d’Dacış udu gabo Demoqratoyo d’Kurdistan. Adyawma Erdoğan kımahdıd bu kboşo d’Şigur, cal dlo qadır dmafıt i tahraztayde bu darbo d’Dacış, elo camıhbol u gabo di KDP sımle koalisyon cami şultonutho d’Ankara, wa hçome dkowın cala Kurdoye bu darbayde kmisomi. U gabo di KDP kıtleste ido ba hçome dıkmisomi ucdo cal Gare, u kobıc dımqadım u gayso Turkoyo u dhoçım cal Şigur. U hçomo dıkmisım cal Gare dyoşo di morutho du Iraqyo, u bebzabno kımathıl lakke kımto b’gwine du athro-en dlp mahıt klayto mqabıl da hçomani.