U gayso Turkoyo mabdele hamle hreto mqabıl du gerilla di PKK

U gayso Turkoyo mabdele hamle hreto mqabıl du gerilla di PKK bu garbyo du Iraq. İ şultonutho Turkoyto manhatla mınyono celoyo d’hayle lu qlimo d’Kurdistan u sımla cuqobe casye cali PKK.

Elo bu zabno da cuqobaniste, u gerilla di PKK’ste sımle cuqobe u mfanele b’qaşyutho a hçome d’Turkiya wu qtile mınyono dfolhe.

23 bu yarhano hawi droşe u şuşote frişe bi sbutho du qtolğenso dan 1915. U rişono Amerikoyo Joe Biden, hawiwole u mamlayde u qamoyo bu telefon camu rişqutno Turkoyo Erdoğan u mawdacwolele, dfsıqle dmawde bu qtoğenso dan Armınoye. Bu tbocofroso, lo frisiwo ğalabe a hfuxye d’Turkiya mqabıl du fusqonano d’Biden, elo Ankara mşadarwola hayle oyaroye udi naşfe lu garbyo du Iraq.

Bıthır b’yawmo 24 Nison, mawdele Biden bu qtolğenso dan Armınoye ubcayni zabno, mabdewola Turkiya hamle hathto dcuqobe calu gerilla di PKK ba turone du garybo du Iraq. Calathe kit şwolo-mın drışwo beyn Biden u Erdoğan u cal mın sebwotho mıttafqiwo a 2 rişone aclaye??

Ba cuqobani dıkmdawmi hani kmo yawme cal Nuhadra uğer dukotho frişe du qlimo d’Kurdistan, kınofıq taxtuşe qaşye u Turkiya kısaymo cuqobe oyaroye b’zayne yaqure cala qıryawotho d’Kani Masi, b’Zab, Qandil, Avaşin uğer. Bu tbocofroso di PKK’ste fris tebe cala taxtuşani u mawdıc, du gerilla kobe funoyo qaşyo u sımle cuqobe cala folhe Turkoye ubı Zap, qtile 2 folhe Turkoye.

Meqım yawmo’ste qtiwole u gerilla 6 folhe Turkoye b’Avaşin. Bi hiğmonutho d’Nuhadra uğer dukotho du qlimano, kito’ste mınyono celoyo d’qıryawotho du camaydan ubi hamle hreto dsımwola Turkiya meqım kmo yarhe, huwola husrono lan arcotho ula mulkone da qıryawothani ubi netiçe maxlanwo ma comurathe mi zuctho da hayathe.