U gayso Turkoyo sımle cuqobe hathe cala turone d’Nuhadra

A tayosyotho du qrobo da hayle kaboşe d’Turkiya, sımlın cuqobe hathe cala turone d’Nuhadra bu garbyo du Iraq.

 A cuqobani simi cal dukotho mbayne qariwo li qritho, bnişo dmımhe bu gerilla di PKK.

U gayso kaboşo d’Turkiya, sımle cuqobe hathe calu turo d’Matin dkıtyo bi hiğmonutho d’Nuhadra. A cuqobani simi belhude yawmo, bıthır mıd i wazirutho du sutoro d’Turkiya mawdacwola, d’hthımla ucdo a cuqobayda calu gerilla di PKK ba turone d’Gare u d’Nuhadra bu garbyo du Iraq.

Lfuth mabuce mu qlimo, a cuqobani d’Turkiya simi qariwo li qritho d’Guharzi wa soruhe nafili b’dukotho mbayne, bnişo dmımhe dharbo lu gerilla. Heş holucdo’ste latyo idico u husrono dhiw lan arcotho da comure di qrithathe. Turkiya kul zabno, kımabdıyo cuqobe cali PKK bu garbyo du Iraq bu fsoso di şultonutho du qlimo d’Kurdistan.

Mawdıc ba cuqobe haroye dsımle u gayso kaboşo d’Turkiya cali hiğmonutho, qtil 12 mdinoye. Bebzabno, lfuth u tebo dfris b’Fırat News dkıtyo qariwo li PKK, a hayle kaboşe d’Turkiya mıstacemlın ğaz kimyawi ba hçomathe dcali maşritho du hbuşyo d’Siyane dkıtyo ba turone d’Gare.

Mawdıc bu zabno da tayosyotho Turkoye madrelın soruhe cali maşrithathe dkıtyo hbuşyo da yasire, mhalıqste ğaz msamımono cala hbişoye. Lfuth u gerilla, i duktho di maşrithathe da Turkoyeste ğalabe csithoyo u noşo lıkqodır dımqadamla. Mcal fothe da cuqobani d’Turkiya cal Nuhadra, jbırwo meqım u camaydan’ste dmaxle ba casrowat dma qıryawothayde di hiğmonutho.