U Gbino Mşihoyo di Lebnon frısle buyono u krıhle a hçome du zawco d’Hizballa
U Gbino Mşihoyo d’Lebnon mzaharle mu gabo İranoyo d’Hizballa dkibe dmahru u maşıqlo folitiqoyo hatho d’Lebnon, u mawdacle ste laşan dmışre u kriz du athro klozım dmitafıt la haye u fusqono d’Emwotho Mhaydotho da na’1559, udmimıd li ido u sistem federaloyo.
BAYRUT – U Gbino Mşihoyo d’Lebnon bu knuşyo cyodoyo dsımle bi mditho d’Bayrut, mawdacle dıklozım dmitafıt la haye u fusqono d’Emwotho Mhaydotho da na’1701 bu formayde kule, dilonoyith u fusqono da na’1559 dkıtyo masro camu groşo du zayno di milişya İranoyto d’Hizballa. U Gbino Mşihoyo matcanle ste u gabo d’Hizballa i netiçe du qrobayde mqabıl d’İsroyel dhule hsurono rabo la Lebnonoye kulle dilonoyith la Maşılmone Şica du athro, ubi netiçe du qrobano İsroyel naqla hreto kbışla qastrat u qıryawotho bu taymno d’Lebnon.
Bebzabno, u Gbino Mşihoyo mzaharle i şultonutho hathto d’Lebnon mu faho d’Hizballa dkobıc dsoyım inqilab cala dangat folitiqoye d’Lebnon, u hathe ste bu darbo du hboso udi marıhbonutho dıksamla ba zabuqone, bnişo dqathle yuthrone b’gawıd di şultonutho udilonoyith dmahıt ido cali wazirutho du momuno.
Camgabıdathe, u Gbino Mşihoyo mawdacle du kenşo emwothoyo knotır ucdo uksoyım duyoqo m’qariwo, cali sbutho da şuşote uda şuhlofe dgıdhowın bıthır mdımnaqe rabhaylawotho Josef Caun rişqutno hatho l’Lebnon, ubıthır mdıhew teklif lu dayono Nawwaf Salam dhuwe dımşakıl I şultonutho hathto. Lfuth du Gbino Mşihoyo, u kenşo emwothoyo kıtle ntarto m’Caun um’Salam dmafiti la haye a’şudoye dhuwolın bi sbutho da fusqone emwothoye, udfoyış u zayno balhude masro camu gayso d’Lebnon.
Bu huthomo du buyonayde, u Gbino Mşihoyo mahwele i zuctho wu keşlo dkıtle m’Hizballa dlımmaqbıl a’şuhlofe dhawın b’Lebnon ubi fnitho, u mawdacle ste du şroyo towo dkulle lu kriz du rejim qentrunoyo dmimıd li idoyo u sistem federaloyo dıknofıq moro la gawne folitiqoye u mdinwoye mqabıl di şalitutho dkıtyo ihidoyto, u hathe ste bnişo dmisım u garanti dqathle kull camo ma came mşahılfe d’Lebnon a’zedqayde, udcoyış b’hirutho, b’şlomo ub’neshono.