U Hudro da Neşe Suryoye b’Turabdin Surkadim sımle hfitutho dı 8 Odor b’Midyad 

MIDYAD – Mu şuroyo du yarhano d’Odor u holucdo, kımdawmi a şutose frişe da neşe du camaydan dkıtne bu athro ubi golutho bu tuyobo d’hfitwotho bi ohnutho d’8 Odor u yawmo Tibeloyo da Neşe.   

Bu falqo d’Turbdin’ste, u Hudro da Neşe Suryoye Surkadim mi cıltho da zulzole dlo sımle hago adşato, mathkarle bğer şıkıl u mrodo dhuwlın a neşe leşan u tlobo da zedqathe bıgawe du makthabzabno.  

A hadımyotho du Hudro bi tahrazto dımbayablın, sımwolın bi qamayto socurutho li iqartho du claymo Suryoyo Fikri dımhasewo bu zulzolo dhawiwo b’Adıyaman, u bıthır la neşe di qritho d’Midın u dı Bsorino u hawiwo droşo acmaye u mahkewolın cali mıcne du yawmano u cali ulsoyutho dmitathkır kul şato.   

Bebzabno mqadım lkul athto u claymtho dkıtwın hadire bi hfituthathe wardo. U Hudro da Neşe sımwoleste socurwotho la neşe du camaydan d’Kafro, Arkah u Hah.   

12 Odor’ste mtayable u Hudro u yawmayde u haroyo di hfituthathe bu salon du Federasyon da Hudre Suryoye b’Turkiya. Bu yawmano dsim u futoheyde mi mşalonitho d’Surkadim Songul Gurkan u kle qatinto d’şetqo cali ruho da sohde du cameydan udu ağuno di hirutho du cameydan.  

Bıthır mahwe u sinewizyon dıkmahke calu ağuno dhulın a neşe bu maktbzabno laşan i hirutho, waydarbo qadiri motın dımbayni yawmo dilonoyo 8 Odor.   

İ mşalonitho du ferco d’HNB d’Turkiya Teodora Hobel Malke mahkela calu  ağuno dkobo i athto Suryoyto xıd ğenso, wu dawro dkıtla bu ağuno umthoyo. Mahkela cala şuşote dsımla HNB bgawed du kenşo du cameydan dmatın l’darğo dmaydi u sutoro du kenşo bi xasra d’Bethnahrin d’Suriya, xıd haylawotho folhoye d’HSNB. Bu huthomo du turgomano mqadım tawdiyotho la yaqrotho dısnıdlın a hfitwothani.