Surto: Reuters
27/01/2023

U Huyodo d’Bethnahrin Athroyo wu Huyodo Suroyo d’Urifi mhanelin Almanya cali mawdyonuththe bu qtolğenso da Ezidoye

U gabo du Huyodo d’Bethnahrin Athroyo wu Huyodo Suroyo d’Urifi, frıslın egartho mşawtafto u mqadamlın a tahınyothathe lu rişqutno ulu parlamento d’Almanya, cali mawdyonuththe bu qtolğenso da Ezidoye. Elo bi egarthathe’ste HBA u ESU grışlın u zuhoro calu qtolğenso etnikoyo dsımwole u tukoso marhıbono d’Dacış calu camaydan u Suryoyo Othuroyo Kaldoyo 6 bu yarho d’Ob da 2014.

27/01/2023

Bu şuroyo di egarthathe HBA u ESU kımmi; Cal ışme du gabo du Huyodo d’Bethnahrin Athroyo udu Huyodo Suroyo d’Urifi, b’iqoro kımqadmina a tahınyothaydan lu rişqutno ula qoyume du parlamento federaloyo d’Almanya bi cohnutho du fusqono ulsoyo dmıdwolın 19 bu yarhano bi sbutho du qtolğenso dsımwo cala Ezidoye.

HBA U ESU mırlın; Bi mawdyonutho kamılto bu qtolğensano, mahwela Almanya awyutho li noşutho ula came dhawın nişo la qtolğense bu Madınho Mescoyo. Emwotho Mhaydotho, u Huyodo d’Urifi uğer athrawotho dmaqbelın u qtolğensano dsımwole u tukoso marhıbono cala Ezidoye d’Şigor bu şuroyo du yarho d’Ob da 2014 maglele, du sebyono’yo dıkmdafıc a timoyotho di demoqratoyutho.

Bi egartho kmitamır; U fusqonano huwle moral u haylo rabo la Mşihoye, la Ezidoye ula came dişe kulle du Madınho Mescoyo. Bu zabno du qtolğensano dsımwo b’Şigor, sımwo’ste 6 bu yarho d’Ob da 2014 qtolğenso tawdithoyo u etnikoyo calu camaydan u Suryoyo Othuroyo Kaldoyo’ste dcaşwo bi daşto d’Ninve u djbir dmahzım ma dukothayde mi barbroyutho d’Dacış.

HBA u ESU kalın’ste cala hçome qtolğensoye dsımwole u tukoso marhıbono calu camaydan di Gozarto-dilonoyith a kboşe, a tenhibe, u shofo wu cnufyo dhawi ba qıryawothayde bu Xabur wi trawma dcayış u camaydan. Ba camlani a barbroye mnase dmıqşıc u camaydan wa Mşihoye hrene mu Madınho Mescoyo. A hayle catume kull naqla kıkurxi cal fırs dmaşın qtolğense.

Bu huthomo HBA u ESU kalın cali ulsoyutho rabtho dkito-du parlamento d’Almanya dmawde bu status folitiqoyo du camaydan u dmoyıd tedbire di mşaynutho leşan dlo mikarıri a qtolğensani bu dactith. Ubu tarano mqadım 5 talabe lu parlamento uli şultonutho Almanoyto;

  • Dhowe mawdyonutho-da hawbe du kboşo, bu tenhibo ubu şuhlofo demoğrafoyo dsımle Dacış bi daşto d’Ninve 6 bu yarho d’Ob da 2014-dkıtyo qtolğenso.
  • Bu inisyativ di şultonutho d’Almanya, dmisım bethdino la hayobe du qtolğenso da 2014 u dmıhkomi b’bethdino Emwothoyo.
  • Dmitahwe snodo leşan u bnoyo wu hethotho da dukotho dmahrıwi me Dacış uda dukotho dhzelın husrono bu zabno du huroro di daşto d’Ninve.
  • Dmitahwe status folitiqoyo u mşaynutho lu camaydan dıkhoye bi daşto d’Ninve.
  • Dmıxlıq mkone lu dcoro du camo djbir dmahzım ma bote uma dukothayde.