U Huyodo d’Urifi dgımtayıb lumodo di mcadronutho la dibhe di zalzale

U Swed dıksoyım ucdo i rişonutho du Huyodo d’Urifi fsıqle camu Komisyon d’Urifi dımtaybi lumodo Emwothoyo leşan u şeçoco du kenşo Emwothoyo dımqadım mcadronutho noşoyto la bnaynoşo dım’athri ma zalzalat qaşye dhawın 6 bu yarhano b’Suriya ubı Turkiya. İ mawdconuthathe’ste hiwo, bu knuşyo dsim lu tbocofroso u griş u zuhoro cala fulhone msarhıbe dıklozım dmisomi leşan u texliso da haye da dıbhe.

Cali sbuthathe di zalzale, i şultonutho du rejim d’Suriya tlıbla mcadronutho mu Huyodo d’Urifi. 2 yawme bıthır mi zalzale dhawyo, tlıbla Darımsuq mu huyodo dımcadır u camo sniqoyo. Hathe inaqla qamayto’yo dıktolıb u rejim snodo mu Huyodo d’Urifi. Athmıl’ste mawdacwole u waziro di baroyutho d’Amerika Antony Blinken dkıtne hadire dımcadri u camo sniqoyo elo latle niye dmabde fulhone bi sbuthathe camu rejim d’Suriya.

U mathlono dilonoyo d’Amerika bu garbay madınho d’Suriya Nikolas Granger’ste mawdacle lu rişono zawgoyo di Sictho da Esore baroye di Mdabronutho yothoyto Badran Çiya Kurd, d’Woşington gıdmşadro mcadronutho la dukotho dım’athri mi zalzalathe. Elo u camo dıkhoye ba dukotho du garbay macırbo d’Suriya-awkith ba dukotho dkıtne kbişe me Turkiya kımawdıc, mu zabno di zalzale uholucdo, lo matile mcadronutho.

Lfuth u ajans d’Reuters, u konvoy qamayo di mcadronutho noşoyto heş ucdo gıdızze lu taymno d’Turkiya, leşan bıthır dşofıc a thume lu garbay macırbo d’Suriya u dmiqadım mcadronutho lu camo sniqoyo. Emwotho Mhaydotho kubco du thumo d’Bab al Hawa dfoyış ftiho, leşan dmiqadım mcadronutho lu camo.