U Huyodo d’Urifi gıdmalım mcadronutho la dıbhe da zulzole

U Huyodo d’Urifi gıdımtayıb lumodo leşan u snodo da came dım’athri ma zulzole dhawın b’Suriya ub Turkiya. U Komisyon d’Urifi wi rişonutho zabnoyto du Huyodo d’Urifi dkıtyo ucdo bided du Swed, m’akade du lumodo u Emwothoyo gıdmisım 20 bu yarhano d’Odor. U lumodano gıdmisomo i baytoyuthayde mşawtıfo mi rişonitho du Komisyon d’Urifi Ursula von der Leyen umu rişwazire du Swed Ulf Kristersson.   

Von der Leyen mırla; “belhude 6 şabe bıthır ma zulzoye qaşye dhawın b’Turkiya u b’Suriya, matina l’awyutho dmahwena u snodaydan la dıbhe. İ awyuthaydan gıdımdawmo dfayşo qwitho xıd aydarbo kıtwa ba şoce qamoye da zulzole.”   

Von der Leyen, maczamla an athrawotho wa tukose Emwothoye kulle dkıtne hem şarye u hemste masre b’şultonutho, dhowın hadire u dmahwın u iqorathe la bnaynoşo dımvayaclın a hayathe, lani dımqadame b’gaborutho ba fulhone dmaşelın u dilonoyith la dıbhe dkıtne ba haye leşan dmıbne dactith towo camhıdode.   

Bebzabno i wazirutho di baroyutho da Fillipin mawdacla dgımşadro cal qariwo 200 alfo dolare xıd mcadronutho noşoyto u zuzonoyto la dıbhe du gunho kyonoyo dhawi b’Suriya. İ wazirutho m’akadlaste du rişqutno Ferdinan d’Bongbong’ Markus Jr. Tlıble mi şultonutho dfulho cami şultonutho du rejim d’Suriya leşan dmiqadmo i mcadronuthathe la sniqoye du zulzolo.