20/10/2021

U Huyodo d’Urifi kıtohım Turkiya dıkducro laxalf bi sbutho du tuyobo da reforme

U Huyodo d’Urifi kıtohım Turkiya dıkducro laxalf bi sbutho du tuyobo da reforme dmahtiwo quma bnişo dcubro lu Huyodo. Bu taşrorano dfrısle u Komisyon du Huyodo d’Urifi kali’ste cali aykanoyutho di demoqratoyutho b’Turkiya.

Me gabo hreno u bethdino da zedqe noşoye du Huyodo d’Urifi tlıble me Ankara dımşahlıfo u qonuno, dıkmçaze kull farsufo dıkmhaqır u rişqutho Recep Tayyıb Erdoğan.

U Komisyon d’Urifi frısle athmıl u taşrorayde da 2021 cal Turkiya u baroyo bıthır mıd fris’ste, i wazirutho di baroyutho d’Turkiya rfıdla u taşroro u mawdacla d’idicat dlatte arcothone. Bu taşrorano mawdıc di şultonutho du rişqutno Erdoğan, kımdawmo dmadcıfo i demoqratoyutho wa qonune du athro u lıkhuşwo a renye dımqadamwole eşqad u Huyodo d’Urifi.

Bu taşroro mawdıc’ste, d’hathe inaqla qamayto’yo d’Ankara bşıkıl ftiho, fayış kırufdo a reforme dmahtiwo quma leşan dmafitolın la haye. Bu taşrorano u yarixo, friş duktho rwıhto calu qedomo la zedqe asasi, li demoqratoyutho, li hirutho du renyo udu maftahfemo, da tagliyotho u ğer u aydarbo u qedomano, zıttır harıw bıthır mu inqilab folhoyo dımnasewo dmisım cali şultonutho ba 2016.

U Komisyon kali cala msoke da gelyonore, da kathowe, da sniğre, da akademikoye, folitiqore-dilonoyith di HDP uda farsufe hfite ba zedqe noşoye wu aydarbo u rejim kıhokım a farsufe dıksaymi i şultonutho sturyo. Elo camathe’ste bu taşroro mbahıs cala gzome d’Turkiya b’Suriya ubu Cıraq, u lan athrawotho şbobe-xıdu Yawnan u Qufrus wi hedriye dkito, dmahıt u Huyodo d’Urifi tedbire cal Turkiya bi sbutho di mdito d’Varoşa.

Bebzabno b’taşroro hreno dfrısle u bethdino da zedqe noşoye d’Urifi dkıtyo b’Strasborug, tlıble me Ankara dımşahlıfo u qonuno dıkmçaze kull farsufo dıkmhaqır u rişqutno Erdoğan. Bi netiçe du qonunano’ste, hkim u msik ba casro alfayo dıbnaynoşo ubu taşroro, friş duktho cal farsufe dilonoye dımçazın yaquro u dkıtne ba hbuşye-xıd mathlo u rişono zawgoyo catiqo di HDP Selahattin Demirtaş.