U Huyodo d’Urifi mahwele ilothnihuthayde mu qedomo dı Turkiya mqabıl du gabo d’HDP

İ rişonitho zawgoyto du gabo demoqratoyo da came di HDP u ferco d’Stanbul Eliv Bulut mawdacla da fulhone dıksaymolın i şultonutho dı Turkiya laşan dmısxır u gabo di HDP mawtbo di demoqratoyuthone.

 Camgabıdathe, u Huyodo d’Urifi adyawma meqım mu knuşyo dhawile bı Bruxel, mahwele ilothnihuthayde mu qedomo dı Turkiya lafa qoyume u hadome hfite di HDP.

 U gabo di AKP bi rişonutho d’Erdoğan wu bnayqyomayde u gabo du Zawco Umthoyo di MHP bi rişonutho d’Bahçeli, kımdawmi b’şıkıl yawmoyo dsaymi hboso calu gabo saqıbloyo di HDP, kmıski a’hadomayde wa rişone da karxıwotho dkıtne masre acme, u kmaqimi i hasinutho da qoyumayde bnişo dsıxri u gabano dkımmathıl u qolo di şawyutho udi demoqratoyutho bı Turkiya.

Cali sbuthathe, i rişonitho zawgoyto du gabo demoqratoyo da came di HDP u ferco d’Stanbul Eliv Bulut, bi maqırhonutho dhula li dafo d’Alcarabiya Net, mawdacla da fulhonani kmisomi mqabıl di HDP bnişo dmitarhıq ma guboye gawonoye du parlamento dıbqamuthayna. Bulut mawdacla ste du gabo di HDP bıthır ma guboye d’7 Hzirın di şato da 2015 mharhazwole u gabo di AKP mıhdode, ubi netiçe çbir dsoyım koalisyon cami MHP laşan dfoyış bi şultonutho. Bulut mırla ste “mu siqumo d’07 Hzirın di şato da 2015 uhul ucdo, u gabo di AKP ksoyım gunhe b’Turkiya, ularwal du athro ste, u mşahlafle i aykanoyutho bı Turkiya l’aykanoyutho du qrobo cama bnaymothoyayde ucama n’athrawotho şbobe. Bayn da gunhe haroye dsımle u gabo di AKP madrele i hadomutho du qoyumo d’Cumer Faruq Gırgırlioğlu dıkfolıh laşan athro dkımqadım b’şawyutho la came kulle. U gabaydan di HDP fayoşo yo, ukmısnıd ma hayle folitiqoye dkobın ağuno mqabıl du fasad du gabo di AKP. İ HDP gabo dıkmıtlıb ma noşe kulle yo. U mawxa ste i AKP cal dlıkobıc dımvayıc i şultonutho kobıc d’maskıt u qolo demoqratoyo du athro xdu gabo di HDP”.

Mxasra hreto, i wazirto di baroyutho du Swed An Linde mırla “i aykanoyutho b’Turkiya latyo mathınhonitho, cal drawiho i sbutho da msoke dilonoyith u msoko da hadome di HDP”. U mamlano sımla Linde adyawma meqım mu knuşyo dhawilın a’wazire di baroyutho du Huyodo d’Urifi bı Bruxel, udıdrışlın ebe an’esore du Huyodo cam Turkiya ucam Rusya ucama n’athrawotho du taymno du yamo Mescoyo.

Camgabıdathe, u mşalo da n’esore baroye du Huyodo Josef Boril mqadamle la wazire taşroro rwiho cala n’esore du Huyodo cam Turkiya. Bu taşrorano Boril mbayanle Turkiya xıd qetro lu Huyodo d’Urifi, u latyo rahuqo dmitahıt tedbire cal Anqara ida dlımaxifo i mwatyutho cama n’athrawotho du Huyodo.

İ şabtho dşaficina ste, u rişono du mawtbo d’Urifi Sharl Mişel wi rişonitho du komisyon d’Urifi Ursola Fonder Liyen, sımwolın qroyto l’Erdoğan dımtayıb a’şartat dıkşowın l’esore şalye camu Huyodo d’Urifi. Mişel u Fonder Liyen makadwolın i ulsoyutho dmıbne u tuxlono m’hatho, bnişo dmisım esore zıd msimone bayn Turkiya wu Huyodo d’Urifi.