U Huyodo d’Urifi mqadamle sturye naşife l’Turkiya
Qoyume d’gabe mşahılfe du Huyodo d’Urifi, mqadamlın sturye naşife l’Turkiya bu knuşyo dhawi bu Mawtbo d’Urifi, hatta Turkiya maşbıholın bu renyo Nazid d’Almanya.
Ba sturye dsımlın a qoyume tlıblın d’Urifi makılyo a esore dcam Turkiya, u hın menayeste mawdaclın d’Urifi, klozım dmakılyo u snodo momunoyo dkobo l’Urifi l’Turkiya cala dyoşe u maqırhonwotho harufe dıksoyım Erdoğan mqabıl da came.
Bu knuşyo dırişo i sutho du sturyo u di hatithutho du yamo mıscoyo wu dawro lo tawo dı Turkiya a qoyume du parlemento d’Urifi naşifo sımlın sturyo Turkiya.
Ba sturye dsımlın a qoyume mıdlın u mşalo da esore baroye d’Urifi Josep Borel nişo dlıkmahıt klayto qşitho mqabıl d’Turkiya ba esore dıksoyım.
Hıdo ma nuqtotho d’ğalabe ma qoyume kalın acla dmitaklın a itawyotho du droşo ducboro d’Turkiya lu huyodo d’Urifi wi mcadronutho dıkmitahwiyo l’Turkiya dmitakılyo bnaqa hıdo. Bu mamlo dsımle u qoyumo Spanyoli dkıtyo u mşalo ba sıbwotho d’Turkiya Nachos Sanches Amor mırle b’esore di awyuthona cam Qufrus u camu Yawnan, Turkiya klozım myaqro a qonune d’Urifi.
U qoyumo Manfred Webe dkıtyo u mşalo du gurub da Mşihoye bu parlemento d’Urifi mırle. Mitaklın a droşe du cboro d’Turkiya lu huyodo d’Urifi. Bu mamlo dsımla iqoyumto da semoloye dkıtyo me Almanya Özlem Demirel mırla ksaymutu sturyo Turkiya kıtxu haq inaqaoyo makleyu u zebono du zayno l’Turkiya.
Ba mamle dsımlın a qoyume tlıblın mu mşalo da esore baroye du huyodo d’Urifi Josep Borell dmahıt klayto naşıfto mqabıl d’Turkiya, u lo esore dsoyım cam Turkiya. Me gabo hreno u waziro di baroyutho d’Fransa Jean Yves le Drian bu mamlo dsımle mırle a athrawotho d’Urifi klozım maydi klayto qrıhto mqabıl dı Turkiya metul dıkdayşo a qonune emwothoye xıdu cboreyda l’Libya uhjomeyda calu Iraq u ğer sıbwotho xıd Suriya.
U rişqutno di Gozarto d’Qufrus Nicos Anastasides bi maqırhonutho dsımle bhaq da ixlale dıksaymo Turkiya tlıble mu kenşo tibeloyo dımahıt klayto qum Turkiya.