23/02/2025

U Huyodo Suroyo d’Urifi-ESU, frısle taşroro calu qtolcamo dsımwole u tukoso marhıbono d’Dacış calu camaydan du Xabur 23 Şbot 2015

23/02/2025

BRUKSEL — Bu taşror d’ESU, bşıkıl rwiho maglele cala husrono dhzewole u camaydan dkull qritho du Xabur dhçımwo acla wu mrodo casino dhuwole u Mawtbo Folhoyo Suryoyo-MFS, djbırwole bi harayto d’Dacış dmıgrış mi fnitho. U taşrorano fris bi cohnutho du yawmo şatonoyo da hçome barbroye dsımwolın a ğrobe marhıbone d’Dacış cal 35 qıryawotho du camaydan bu Xabur bu garbay madınho d’Suriya 23 bu yarho d’Şbot da 2015. Bu şuroyo du taşrorano dkıtyo 3 fothotho u şıkıl d’buhono, kmitahke cala hçome dsimiwo, u qtolcamo, u tehriwo wu husrono dhuwolın a marhıbone la qıryawotho du camaydan dkıtne hedor u nahro du Xabur.

Bebzabno bu taşrorano mşalıt bahro calu ağono dhuwole u Mawtbo Folhoyo Suryoyo-MFS mqabıl d’Dacış wi dbihuthnafşo dmahwelın a Mharbone dnafiliwo Sohde bu mrodo caşino dhuwolın b’gaborutho rabtho. ESU kımawdıc da hçomani d’Dacış dkıtwın nesyuno d’qtolcamo sistematik u maglele calu husrono dhuwole. U taşroro kımawdıc, dhol 200 man abne du camaydan htifiwo u msikiwo yasire; mınyono celoyo d’sobe, neşe u nacime mafiti b’teşniqe u qtiliwo dlo rahme; a bote, dayre u citotho manhıbi u mawqıdi; ban alfayo d’camo jbir dmahzım lğer dukotho.

ESU mawdacle’ste a qıryawotho dhzewolın bu zyodo husrono-Tel Hormız, Tel Şamiram, Tel Nasri, Tel Jazira u Tel Goran’wın. Bu taşrorano’ste, friş duktho cala qıryawothani wa hçome u taxtuşe dhawın ebeye wu mrodo dmahwele u camo wa Mharbone d’MFS. Bebzabno ESU mawdacle du nişo d’Dacış, dqoşıc i hiyoyutho du camaydan’we. Kle bu taşrorano aydarbo MFS mharabwole cama hayle hrene di YPG udqadiri bi harayto ba 2016 dmaydi naqla hreto u duyoqo kamilo da qıryawotho du camaydan dkbişiwo me Dacış.

MFS markawole’ste bi netiçe nuqazyotho folhoye bi fnitho leşan u duyoqo di mşaynutho da qıryawothani u dnofıq moro lu athro dan abohothayde. Elo u hçomano d’Dacış m’atharwole ğalabe calu camaydan di fnitho u mınyono celoyo mgalwewole l’Amerika u Lebnon wu calathe klozım a hçomani dmitıctarıf ebeye xıd nesyuno d’qtolğenso calu camaydan. ESU rızle an 4 talabayde bi harayto du taşrorano u hani’ste;

A hçome d’Dacış klozım dmimodi li ido ba bethdine Emwothoye u dmıhkomi a marhıbone dsımlın a gunhani. 

Dmiqadım snodo momunoyo u noşoyo la yaqrotho Suryoye Othuroye dkubci ducri la qıryawothathe. 

A citotho wa remze du camo klozım dmıbnoyo u dmihathıthi leşan dmihafıd cali yortutho marduthoyto du camo Suryoyo Othuroyo. 

Klozım dhowe garanti di mşaynutho Emwothoyto leşan u sutoro du camo Suryoyo Othuroyo u dlo mitahwe aftho dmikarıri a hçomani acle.  

Bu huthomo ESU mırle; U camo Suryoyo Othuroyo dmafıt dore yarixe b’rdufye u cnufyo, kull naqla huwle mrodo u mhafadle i hiyoyuthayde. Adyawma’ste MFS uğer hayle qlimoye kımdawmi u ağono leşan dım’akdi u dactith du camo Suryoyo Othuroyo.