U Iraq krofıd u dcoro da galwoye di maşritho d’Alhol cal dkıtne qento

U menyono da galwoye dıqtili udımçarhi bi maşritho d’Alhol bu garbay madınho d’Suriya, mati l’zıd m’35 farsufe.

 Mxasra hreto, i şultonutho du Iraq krıfdo u dcoro da galwoye di maşirtho d’Alhol, cal dkımşakli qento calu Iraq.

 A’haylawotho di mşaynutho mqafelın şlado d’galwoyo Iraqoyo bi maşritho d’Alhol dkıtyo hedor di mditho di Hasake bu qlimo di Gozarto d’Suriya. Sef Cabıd Cajıl dıqtil bu zayno, athmıl mqafyo i şladayde bu falqo trayono di maşritho d’Alhol, ubu şıklano u menyono da galwoye dıqtili udımçarhi b’gawıd di maşritho mati l’36 farsufe.

Bu zabno dıkzaydi a’gedşe du qatlo da galwoye Iraqoye bi maşritho d’Alhol, i şultonutho d’Boğdodste krıfdo hul ucdo dmitadcıri a’galwoyani lu athro. U wakilo di wazirutho di galwoyutho du Iraq Karim Alnuri, mırle “krıfdina u dcoro da galwoye d’Alhol lu Iraq mi celtho du qentaththe. Elo fusqono ruşmoyo heş lımmid bi sbuthathe”.

İ maşritho d’Alhol kiba zıd m’62 alfo galwoye, baynothye kito 30 alfo u 706 galwoye dıkmifarqi cal 8 alfo u 284 yaqrotho.

Meqım mathe, u wakilo du notarrozo gawonoyo du makıthbo d’Ewmotho Mhaydotho du nfoqo mqabıl di marıhbonutho Fladimer Voroncov, tlıbwole dmitadcır 27 alfo nacime dkıtne bi maşritho d’Alhol la n’athrawothaththe. Voroncov mırwole ste “i aykanoyutho mahişonitho da nacime bi maşritho d’Alhol, kımmathlo hdo ma sebwotho rabe kulle dıbritho dkito adyawma sniqutho lu şroyaththe”.