U kenşo da Rum d’Turkiya mahwele hfuxyo mqabıl du fusqono d’Erdoğan cali cito d’Kariye

U kenşo da Rum d’Turkiya, kıthuwlın egartho lu rişqutno Recep Tayip Erdoğan dı docır mu fusqono dhuwle cali cito d’Kariye, dmisomo masığdo da Maşılmone.

 U Huyodo Tibeloyo da Rum bi egartho dımşadarle komır: U fusqonano dmid, latle asirutho bi kinutho, mawxa klozım dmitadcıro i cito xıd bethcatiqotho

Bıthır me Ayasofya dımşahılfo l’masığdo, mşahılfoste hıdo ma citotho catiqotho  dmacımro ba 534 mu qadişo Teodius, bu zabno du malko Justinianus u qamoyo, l’masığdo. Bhaq du fusqonano dmid mu bethdino celoyo d’Turkiya, u dımayıd mu rişqutno, u Huyodo Tibeloyo da Rum mahwele hfuxyo u tlıble me Erdoğan dmafıt u fusqonano me qum di cayno udmadcıri i cito l’bethcatiqotho.

U Huyodo dımahkele cali ulsoyutho di citathe wa rşome dkito bgawa dkıtne di Mşihoyutho, mawxaste tıryo xıd bethcatiqotho leşan dımhafdi arşome wa syome makthabzabnoye dkito eba. U huyodo bi maqırhonutheyde komır; Naqlat hrene maslıqo i sbutho di citathe lu bethdino celoyo d’Turkiya, elo lo maqbıl dmisomo masığdo da Maşılmone. Ucdo kmimıd hawxa fusqono cali citathe u di cito d’Ayasofya u fusqonano siyasiyo u latle asirutho bi kinutho du bethdino.

U Huyodo Tiebeloyo da Rum bi maqırhonutheyde mırle; Kubcina du rişqutno dmafıt u fusqoano dlatyo kino me qum di cayno u dmihafıd cala dukothe dkıtne makthabzabnoye wa dukotho a bınyone yortuthoye dfayşi bu iqorathe.

U rişono du Huyodo Niko Uzunoğlu mırle: Hani 50 eşne, i citathe bethcatiqothoyo, u şhlofeyda l’masığdo, latyo mede dıkmıfhım u dmitahwele yuqro. Laybi dobeno mıcne lu şuhlofano di cito l’masığdo; cito dkıtyo catıqto u bebzabno mqayatto bu tukoso d’UNESCO.