U koalisyon emwothoyo b’cuqobo dilonoyo dsımle bi fnitho dı Der Ezzor msıkle ha ma rişone dı Dacış

U koalisyon emwothoyo dkımrayşınole Amerika, b’cuqobo dilonoyo dsımle bi fnitho dı Der Ezzor msıkle ha ma rişone dı Dacış dkımşakalwo qento rabo cala fenyotho du garbiyo udu madınho d’Suriya.

Bu cuqobano dsımle u koalisyon, qayıthle ste snodo ma haylawotho d’Suriya demoqratoyto d’QASAD.

U koalisyon emwothoyo dkımrayşınole Waşington wi wazirutho du sutoro d’Amerika u Pentagon, ğalabe naqlat mawdaclın du koalisyon gıdımdawım dmaqwe i şkihuthayde b’Suriya, bnişo dımcadır a’haylawotho d’Suriya demoqratoyto d’QASAD bu nfoqo mqabıl da krulyotho dfayişi du tukoso marıhbono dı Dacış.

Bu taro du stratiji folhoyo dımbayanla Amerika bu athro d’Suriya, athmıl a’haylawotho du koalisyon emwothoyo msıklın ha ma rişone rabe dı Dacış bu madınho d’Suriya.

Lfuth u qentrun du tboco froso d’QASAD, u koalisyon msıkle u marıhbono rabo dı Dacış, b’cuqobo dilonoyo dsim bi qastra d’M(h)aymida bu macırbo di fnitho dı Der Ezzor. Lu cuqobano mıştawtafla gudo du komandos dmanhıto mıhdo tayisto folhoyto du koalisyon.

U marıhbonano dımsik hfitowe bu tuyobo da furqoce uda swikaste, ubi mtaksonutho da fulhone da krulyotho dı Dacış wa n’esore dbaynothaye ba fenyotho du garbiyo udu madınho d’Suriya wa thume bayn du Iraq u Suriya.

Camgabıd du msokayde, a’haylawotho du koalisyon mahıtlın ste ido cal kmoyutho rabtho d’foqucwotho, zayne u alat lojestik cam warqe di ruşmoyutho.

Bi maqırhonutho dhule u qentrun du tboco froso d’QASAD, makadle da grube dıilonoye dıknıfqi mqabıl di marıhbonutho da haylawotho d’Suriya demoqratoyto, mqadamlın snodo di mşaynutho lu koalisyon, bnişo dmakşır u cuqobo dsımle calu marıhbono rabo dı Dacış.