U koalisyon emwothoyo i Peşmerge ba cuqobe dsıme qtilın 15 marhıbone d’Dacış

Ba cuqobe mşawtıfe dsımle u koalisyon Emwothoyo dkıtyo bi rişonutho d’Amerika cama hayle Kurdoye di Peşmerge du qlimo d’Kurdistan cala turone d’Qaraçox, qtilın 15 marhıbone d’Dacış.

 Me gabo hreno mawdıc, d’Danimark mşadarla 285 folhe hrene lu Iraq, leşan i mşawronutho ulu droşo da haylawotho di mşaynutho du athro.

 Lfuth u tbocofroso du qlimo d’Kurdistan bu garbyo du Iraq, a haylawothathe di Peşmerge wu koalisyon Emwothoyo dıkmirayşın me Amerika, sımlın cuqobe casye cala marhıbone d’Dacış dkıtne ba turone d’Qaraçox dıknufli qariwo li mdito d’Maxmur bu garbyo du athro.

 U rabhaylawotho di Peşmerge athmıl casriye m’akadle, ba cuqobani dsimi bı zabno d’48 şoce, qtile u koalisyon wa hayle Kurdoye hol 15 marhıbone. U rabhaylawotho mawdacle’ste, ğalabe naqlat grışwolın u zuhoro-da marhıbone d’Dacış bıdelın naqla hreto dımtaksi ruhaye bı dukotho frişe du athro-dilonoyith ba dukotho dkıtla Arbil u Boğdod m’watyutho aclaye.

 Bebzabno mawdıc, du gayso d’Danimark mşadarle 285 folhe hrene lu Iraq, leşan dımcadri bu droşo da hayle di mşaynutho dkobın ağono mqabıl da krılyotho da marhıbone. Danimark hadımto’yo bu NATO-wu huyodano mabdewole a cuqobayde bu Iraq bu yarho d’Teşrin u qamoyo da 2018 bi rişonutho d’Kanada.

 Danimark tlıbla dsaymo i mşalutho NATO bu droşo da hayle Iraqoye l’zabno d’18 yarhe u kımıntır bi şato dıbqamuthayna dmabdıyo a fulhonayda. Calathe ucdo u waziro di baroyutho d’Danimark Jeppe Kofod mırle; Bi mşalutho dgımaydina cala droşani bu Iraq, kıbcina dmaqwena a hayle du athro leşan dı qudri bıthır hınne dımdabri i mşaynutho du athro.