U Koalisyon Emwothoyo mawdacle dımşarele dgorış ahaylawothayde mu Iraq

U koalisyon Emwothoyo dkıtyo bi rişonutho d’Amerika mawdacle, dımşarele dgorış ahaylawothayde mu Iraq calu qento du virus d’Corona. A haylawothani mdarşiwo a folhe du gayso Iraqoyo bu ağuno mqabıl da ğrobe marhıbone d’Dacış.

 Bebzabno u gayso Iraqoyoste bu şuroyo du yarhano, maklewole a droşe folhoye xıd tedbir mqabıl du virusano dmibarbız beyn da haylawothayde.

 U koalisyon Emwothoyo dkobe ağuno mqabıl da ğrobe marhıbone d’Dacış bu Iraq, adyawma m’akadle dmaklele ucdo a droşe fulhoye da hayle Iraqoye hol zabno lo mbayno. Bebzabno u koalisyon mawdacleste dımşarele bu groşo da folhayde mu Iraq cal du virusano kımdawım d’tofe la bnaynoşo bu athro.

Bu Iraq kito 177 farsufe dkıtte u virusano u 12 farsufe nqili ma haye. Meqım 2 yawmeste mawdacwole u waziro du sutoro d’Britania dımbayanlın tahrazto du groşo d’sahmo ma folhathe dkıtne bu koalisyon Emwothoyo xıd tedbir mqabıl di Corona. Bebzabno u koalisyon mawdacle, da folhe Iraqoye hadirene ucdo dkolın mqabıl da qente uda gzome da marhıbone.

Wu mşalo du gayso du Iraqste m’akadwolın dmıdlın i foqudutho d’al Qaim dkıtyo qaruwto la thume d’Suriya, bıthır mıd ahayle du koalisyon Emwothoyo grişi mena. U koalisyon mawdacleste, d’sahmo rabo ma folhathe gıdmınqoli lğer qentrune folhoye. U koalisyon kıtle hol 7.500 folhe bu Iraq; beynothaye 5 alfo folhe Amerikoye.

U groşano da hayle du koalisyon athiste lu huwoyo, bu zabno da hayle Şica du Iraq dıkmısnodi mu İran, maqşelın a hjomathe cala qentrune da hayle nuxroye awkith d’Amerika udan athrawotho bnayqyomayda. Bıha ma hjome dsımwo bu yarhanoste qtılwo 2 folhe Amerikoye uha Britanoyo.