U koalisyon emwothoyo mqabil Dacış mtayable lumodo b’Madrid

MADRID — U grub nacimo du koalisyon emwothoyo mqabıl Dacış, sımle adyawma knuşyo bi mditho d’Madrid, bi rişonutho du tahlufo gawonoyo di siyase baroyto udi mşaynutho d’Spania Alberto Oslay, ubi mıştawtfonutho du mşalo Amerikoyo dcali sdirutho da sebwotho du nfoqo mqabıl di marıhbonutho Grigori Logervo. 

U knuşyano mşarele bu mamlo du futoho dsim mu tahlufo du waziro di baroyutho uda sebwotho emwothoye d’Spania Diego Martinez Bilio dımakadle ebe i ulsoyutho dımdawmi a’fulhone emwothoye mqabıl Dacış. 

Bu knuşyano, a’mıştawtfone ba mamle dsımlın grışlın u zuhoro calu qento dkıtle u tukoso dı Dacış cala mdinoye, wu qento dkıtlın a’marıhbone mharbone dkıtne hbişoye ba maşıryotho da galwoye bu garbay madınho d’Suriya. 

Bebzabno, a’mıştawtfone makadlın i ulsoyutho dmitaqwiyo i mşaynutho da thume udmitahwe mawdcınwotho lıhdode, udmitadcıri a’barmothoye Suriye u Ciraqoye wa barmothoye da n’athrawotho mşawhıre la kenşaththe ula n’athrawothaththe a’şerşoye bu taro da fulhone dıkmisomi, laşan du garanti dmitarkıwo i şalyutho ba fenyotho dıkbişiwole Dacış mı meqım. 

Camgabıdathe, a’mıştawtfone kalın cali sbutho d’aydarbo kibe dmitakle u haylo du tukoso dı Dacış udmitahıt manciye b’qamuthıd du hzuqyo emwothoyo da marıhbone udlıssaymi hçome baroye.  

A’mıştawtfone drışlın ste aydarbo kibe dmınfıq mqabıl di propaganda dı Dacış udi masırhonutho da marıhbone dıkmisomo bu darbo du nawlo udu teknoloji hatho.