25/11/2020

U Koalisyon saqıbloyo laqi u qatolo di folitiqoyto Hevrin Xalaf

Zıd me 20 knuşyotho u tukoso da zedqe noşoye d’Suriya, krıhlın a socurwotho dıksaymilın a rişone du koalisyon athronoyo saqıbloyo la fenyotho du garbiyo d’Suriya dkıtne kbişe meTurkiya.

 Bu buyono dıfrıslın a tukosani, maglelın cali lqoyto dhawile u koalisyon cam rişone du gayso athronoyo d’Suriya bi mditho d’Iczaz, baynothye u qatolo di rişonitho zawgoyto du mawtbo d’Suriya demoqratoyto d’MSD Hevrin Xalaf.

 U gayso kaboşo dı Turkiya kımtayıb socurwotho la jatawiyayde arişone du koalisyon athronoyo saqıbloyo d’Suriya dhani kımo naqlat ba zabne haroyani ksaymi socurwotho la fenyotho kbişe bu garbiyo d’Suriya dilonoyith li mditho d’Cafrin, bnişo dımdagıl ataşrore dıkfırsilın atukose emwothoye u dıkmawdıci ebaye du gayso Turkoyo cama jatawiyayde ksaymi gunhe du qrobo u gunhe hrene mqabıl di noşutho ba fenyotho kbişe bu garbiyo d’Suriya.

U buyono dımde athmıl me 23 knuşyotho u tukose da zedqe noşoye d’Suriya, maglele calu skandal di socurutho dsımle u rişono du koalisyon saqıbloyo Nasır Alhariri wu hadomo di sictho folitiqoyto Cabdalla Kaddo dkıtyo Kurdoyo li mditho kbışto d’Cafrin. Bi socuruthathe, i taşdarto du koalisyon laqyo grub ma jatawiye bu zabno dıkmanhıbiwo a bıstone da zaytune dkıtyo u morathe galwoyo mi mditho d’Cafrin. İ taşdarto du koalisyon dkarixo ba haqle da zaytune grışlaste surotho cama jatawiye ganowe.

Bıthır mathe, u buyono da tukose da zeqde noşoye d’Suriya grışle u zuhoro cal skandal hatho bu zabno dlaqiwo Nasır Alhariri cam taşdarto du koalisyon, bıha ma mşale folhoye dacla gunhe du qrobo dkowın ba fenyotho du garbiyo u du madınho d’Suriya.

Camgabıdathe, u buyono maglele cal skandal hreno rabtır, u mawdacle du rişono du koalisyon Alhariri mıstaqbele lumıhreno bu qentrun du koalisyon dkıtyo bi mditho d’Iczaz, taşdarto folhoyto ma rişone du gayso athronoyo d’Suriya, baynothaye Ahmad Hassan Alhayıs dıkmidıc bu ışmo d’Hatem Abu Şaqra. U marıhbonano dkıtyo u rişono du grub du kunoşo dıkqore ruhe Ahrar Alşarqiya kmıthım ma tukose d’Emwotho Mhaydotho dsımle gunhe du qrobo b’Suriya. Bebzabno, u marıhbonano dyatu camu rişono du koalisyon saqıbloyo u qatolo di rişonitho zawgoyto yo du mawtbo d’Suriya demoqratoyto Hevrin Xalaf.

Bu zabno dıkbışwola Turkiya hın ma fenyotho du garbiyo udu madınho d’Suriya, ajatawiye dıkmısnodi me Anqara b’şıkıl barbroyo qtiwolın i folitiqoyto mdinoyto Hevrin Xalaf cam tıre ma noturayda bu yarho dı Teşrin u Qadmoyo i şato da 2019 calu darbo tibeloyo d’M4 bu garbiyo d’Raqqa.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…